निजी क्षेत्रबाट ल्याइएका खसी, बोका र च्याङ्ग्राहरु बजारमा बेच्नका लागि राखिएको छ ।
खाद्य व्यवस्था तथा व्यापार कम्पनी लिमिटेडले यस वर्ष दशैँमा खसी, बोका, च्याङ्ग्रा विक्री नगर्ने भएसँगै काठमाडौं उपत्यकामा निजी क्षेत्रले भित्र्याएका खसी बोकाहरु बजारमा बेच्नका लागि राखिएको हो । काठमाडौंको टुकुचा खसी बजार, कलंकीस्थित खसी बजार, भृकुटीमण्डप लगायतका स्थानहरुमा व्यापारीहरुले विभिन्न स्थानबाट ल्याएका खसीबोकाहरु देख्न सकिन्छ ।
धादिङ, नुवाकोट, काभ्रेपलाञ्चोक, दोलखा लगायतका जिल्लाहरुबाट व्यापारीहरुले खसी, बोकाहरु काठमाडौं ल्याएका छन् । जेन—जी आन्दोलनका क्रममा सरकारी सम्पतीमाथि भएको आगजनी, तोडफोडबाट भौतिक संरचनाहरु ध्वस्त भएसँगै लिमिटेडले यस वर्ष सरकारी स्तरबाट खसी, बोका, च्याङ्ग्रा विक्री नगर्ने निर्णय गरेको छ । तर बजारमा निजी क्षेत्रबाट ल्याइएका खसी बोकाहरु उपलब्ध हुने र व्यापारीहरुले मूल्य बढाउनसक्ने भएकाले अनुगमन जारी रहने बताएको छ ।
यसबाट आम उपभोक्तालाई केही असर पर्ने देखिएपनि निजी क्षेत्रले जटिल अवस्थामा सहयोग गर्ने विश्वास सरकारको छ । कम्पनीले यसअघि करिव १ हजार ५ सय खसीबोका र ३ सय च्याङ्ग्रा आपूर्ति गरी सुपथ मूल्यमा विक्री गर्ने तयारी गरेको थियो । तर अशान्त परिस्थिति र यातायात सहज नहुन सक्ने जोखिमका कारण विक्री नगर्ने निर्णय लिइएको हो । यद्यपि खाद्यले दशैंका लागि आवश्यक खाद्यान्न र अन्य सामग्री भने सुपथ पसलमार्फत विक्री वितरण शुरु गरिसकेको छ ।
दशैँका लागि टुकुचा खसी बजार, हरिहर भवनस्थित पशु सेवा विभागको चाडपर्व लक्षित पशुपंक्षी बजार सञ्चालनमा रहेका छन् । कलंकीको खसी बजारका व्यवस्थापन समितिका व्यवस्थापक जीवनराज खतिवडा कलंकी खसी बजारमा विगत ३१ वर्षदेखि सञ्चालनमा रहेको र खाद्यले समेत खसी बोका विक्री नगरेसँगै चुनौति थपिएको बताउनु भयो । त्यसलाई मध्यनजर गर्दै काठमाडौंवासीलाई सहज र सुलभ तरिकाले उपलब्ध गराउने भन्नेबारेमा तल्लिन रहेको बताउनु भयो ।
काठमाडौंको माग पूरा गर्न देशका विभिन्न ३५ जिल्लाहरुबाट खसीबोका ल्याइरहेको बताउनु भयो । पहिरो र सडकको अवस्थाले सय भन्दा बढी खसी,बोकाहरु सडकमै मरेको बताउनु भयो । व्यापारीहरु त्यसबाट चिन्तित रहेको बताउनु भयो । अघिल्लो वर्षको तुलनामा खसी,बोकाको मूल्य खासै नबढेको बताउनु भयो ।
विगत वर्षहरुमा पनि खाद्यको भन्दा सस्तोमा खसी,बोका उपलब्ध गराएको दाबी गर्नुभयो । मूल्यमा खासै उत्तारचढाव नआउने र खाद्यले नल्याउँदा पनि मूल्य विगतकै कायम राखेर सहज रुपमा विक्री गर्ने व्यवस्था मिलाएको बताउनु भयो । गत वर्ष करिव २५ हजार खसीबोका, दशैँमा विक्री भएको र अहिले पनि त्यहीअनुसारको व्यवस्थापन मिलाइएको बताउनु भयो । सडकहरु अवरुद्ध नभएको खण्डमा मात्रै त्यो माग पूरा गर्नसक्ने बताउनु भयो । सडक अवरुद्ध भएकोखण्डमा उपत्यकाको माग पूरा गर्न नसक्ने अवस्था रहेको बताउनु भयो ।
खसी व्यपारी सन्तोषबहादुर खत्रीले बजारमा खसी बोकाहरु प्रशस्त खसी बोकाहरु रहेको र १० हजार भन्दा बढी खसी बोकाहरु रहेको बताउनु भयो । बजारको माग पनि राम्रो रहेको बताउनु भयो । विगतकै मूल्यमा खसीबोका बेचिरहेको बताउनु भयो । बाटोको समस्याले खसी बोका आयात गर्न कठिनाइ भइरहेको बताउनु भयो । त्यस्तै अर्को व्यापारी बलराम कुँवरले दशैँमा बाटोका कारणले खसी बोका आयातमा कम भइरहेको बताउनु भयो । बसबाट थोरै संख्यामा खसीबोका ल्याउन सहज गर्न पनि माग गर्नुभयो । प्यासेन्जर गाडीमा खसी हाल्न नपाएपछि उपत्यकामा खसीको अभाव हुने बताउनु भयो ।
खसी बजारमा जिउँदो खसीको मासु प्रतिकेजी ६ सय ७० रुपैयाँदेखि ७ सय ३० रुपैयाँसम्म रहेको छ । त्यस्तै जिउँदो बोकाको मूल्य प्रतिकेजी ६ सइ ५० देखि ७ सय ३० सम्म रहेको छ । त्यस्तै जिउँदो च्याङ्ग्राको मूल्य प्रतिकेजी १ हजार २ सय ४० देखि १ हजार ३ सय रुपैयाँसम्म रहेको छ ।
