एमालेको ११ औँ राष्ट्रिय महाधिवेशनः पाँचौँ दिन बिहानैदेखि मतदानको चटारो

नेकपा (एमाले) को ११ औँ राष्ट्रिय महाधिवेशनको पाँचौँ दिन आज बिहानैदेखि महाधिवेशन स्थल भृकुटीमण्डपमा चहलपहल बढेको छ । नयाँ नेतृत्व चयनका लागि मतदान प्रक्रिया शुरु हुन लागेकाले नेता तथा कार्यकर्ताहरूको उपस्थिति बाक्लो देखिएको हो । प्राविधिक तथा मौसमी कारणले मंगलवार साँझसम्म धकेलिएको मतदान बुधवार बिहान ८ बजेदेखि शुरु हुनेगरी सारिएको थियो । महाधिवेशन प्रतिनिधिहरू लामो लाइनमा लागेर विद्युतीय मतदान मेसिनमार्फत आफ्नो मताधिकार प्रयोग गर्न तयार भएका छन् । देशभरबाट आएका २ हजार २६३ जना प्रतिनिधिले अध्यक्षदेखि केन्द्रिय सदस्यसम्मका पदहरूका लागि मत हाल्नेछन् ।