राष्ट्रिय स्वतन्त्र पार्टीका सभापति रवि लामिछाने र काठमाडौं महानगरपालिकाका मेयर बालेन्द्र साह (बालेन) बीच मध्यरातमा भएको भेटवार्तालाई दुवै पक्षले सकारात्मक रूपमा लिएका छन्। असिम साहको म्युजिक कम्पनी जी–२१को कार्यालयमा भएको भेटपछि दुवै नेता एउटै गाडीमा निस्किएका थिए।
भेटको संयोजन गरेका रास्वपा नेता असिम साहका अनुसार छलफल सौहार्दपूर्ण वातावरणमा भएको र मिलेर अघि बढ्नुपर्ने विषयमा केन्द्रित थियो। ठोस एजेन्डा सार्वजनिक नगरिए पनि यस भेटले राजनीतिक सहकार्यतर्फ संकेत दिएको उनी निकट नेताहरूको भनाइ छ।
असिम साहले यसलाई “देशले खोजेको आशाको मिलन” भन्दै सामाजिक सञ्जालमार्फत ‘कथाको सुखद सुरुवात भएको प्रतिक्रिया दिएका छन्। सहकारी प्रकरणमा धरौटीमा रिहा भएपछि रवि लामिछाने पछिल्लो समय सक्रिय राजनीतिक भेटघाटमा देखिन थालेका छन्, जसले नयाँ सत्ता–समिकरणबारे चर्चा थप चर्किएको छ। यसैबीच, यो वार्ताले पुराना राजनीतिक दलभित्र राजनीतिक भूकम्पको पराकम्प गएको चर्चा समेत सुुरु भएको छ ।
