पुम्दीभुम्दीमा मत माग्न गएका नेकपा कास्की ३ का उम्मेदवारसँग स्थानीयले युवालाई देशमै बस्ने वातावरण बनाउने अबको नेतृत्वले पहल गर्नुपर्नेमा जोड दिए ।
कास्की क्षेत्र नम्बर ३ का नेकपाका उम्मेदवार गोपाल गिरीसँग उनीहरूले पुराना दलहरूको मनोमानी र जोरजबरजस्तीले जेनजी आन्दोलन भएको जनाउँदै अबको यात्राको नेतृत्व गर्न सक्नेलाई छान्ने बताएका थिए ।
उम्मेदवार गिरीले देशमा बस्ने वातावरण निर्माण गर्ने प्रतिबद्धता जनाउँदै भने,
‘सुशासन र विकासको माध्यमबाट युवालाई नेपालमै बस्ने वातावरण मिलाउँछौं ।’
मतदाताले विजयी भएपछि फेरि अर्को चुनावमा नआउने प्रवृत्ति बदल्न आग्रहसमेत गरेका थिए ।
पोखरा–२२ खाल्सेमाका स्थानीयले गाउँमा बाँदर आतंकले बालीनाली लगाउने अवस्था नरहेको सुनाए । उम्मेदवार गिरीले बाँदर नियन्त्रणका लागि पनि आफूसँग योजना रहेको भन्दै सो योजना कार्यान्वयनका लागि पहल गर्ने वाचा गरे ।
यस्तै कास्की क्षेत्र नम्बर १ मा नेकपाका उम्मेदवार राजकाजी गुरुङले घरदैलो र भेटघाट जारी राखे । नेकपाले पोखरा–२६ मा सम्पर्क कार्यालय स्थापना गरेको छ भने घरदैलो र भेटघाटलाई पनि निरन्तरता दिइरहेको चुनावी कमान्डर सोमती गुरुङले जानकारी दिइन् ।
कास्की २ का उम्मेदवार किरण थापा (आमोद) पनि घरदैलो कार्यक्रममा व्यस्त भए । पोखरा–२०, भलामको ठकरी टोल, भलाम एरिया, डाँडागाउँ, भण्डारीथर हुँदै वडा कार्यालयसम्मको क्षेत्रमा घरदैलोमा उनले स्थानीयका सुझावसमेत संकलन गरेका छन् ।
जनताको सुझावअनुसार नै विकासको खाका बनाउने योजना अन्तर्गत सुझाव संकलन गरिएको सो क्षेत्रका चुनावी कमान्डर खड्क हमालले जानकारी दिए ।
सो अवसरमा स्थानीयले महानगरमा भए पनि पोखरा–२० विकासको मामलामा बत्तीमुनिको अँध्यारोमा परेको गुनासो गरे । मुख्य बाटो पिच भएको तर घर जाने बाटोचाहिँ जोखिमपूर्ण रहेको भन्दै लक्ष्मी सुनारले भनिन्,
‘कतिबेला दुर्घटना हुने हो भन्ने पीर हुन्छ । हामी त पोखरामा भएर पनि विकासमा पछि परेको कर्णालीजस्तो भयौं ।’
