पोखरा, वैशाख २७ न्यु ग्यालेक्सी इङ्ग्लिस सेकेन्डरी स्कुलद्वारा आयोजित ८औँ एसईई इभेन्ट्स २०८३ अन्तर्गत बास्केटबल, फुटसल तथा अनलाइन प्रश्नोत्तरी प्रतियोगिता सम्पन्न भएको छ। विद्यालयले आयोजना गरेको उक्त प्रतियोगितामा विभिन्न विद्यालय तथा क्लबहरूको उत्साहजनक सहभागिता रहेको थियो।
कार्यक्रमका प्रमुख अतिथि एनप्याब्सन केन्द्रीय समितिका उपाध्यक्ष यम बहादुर खड्का रहेका थिए। त्यसैगरी विद्यालयका प्राचार्य डा. रामजी शर्मा, विद्यालयका निर्देशक राजु कायस्थ, केन्द्रीय बास्केटबल संघका उपाध्यक्ष जुम गुरुङ तथा विशेष अतिथि एन प्याब्सन केन्द्रीय सचिव राम बहादुर थापा सहभागी भएका थिए।
प्रतियोगिताअन्तर्गत सम्पन्न छात्र बास्केटबलतर्फ जलजला पर्वत विजेता बन्दै नगद रु. २० हजारसहित ट्रफी, मेडल र प्रमाणपत्र प्राप्त गर्न सफल भएको छ भने शिखा ‘ए’ प्रथम उपविजेता बन्दै नगद रु. १० हजार प्राप्त गरेको आयोजकले जनाएको छ।
त्यसैगरी छात्रा बास्केटबलतर्फ मर्दीखोला ए विजेता बन्दै नगद रु. १० हजार प्राप्त गर्न सफल भएको छ भने मर्दीखोला ‘बी’ प्रथम उपविजेता बन्दै नगद रु. ५ हजार प्राप्त गरेको छ।
फुटसल प्रतियोगितातर्फ सेजल एफसी विजेता बन्दै नगद रु. १५ हजार हात पार्न सफल भएको छ भने बार्बर नेशन बी प्रथम उपविजेता बन्दै नगद रु. १० हजार प्राप्त गरेको छ।
यस्तै अनलाइन प्रश्नोत्तरी प्रतियोगितामा अरेमोन् अधिकारीले नगद रु. ५ हजार तथा ऋतु शर्माले नगद रु. ८ हजार पुरस्कार प्राप्त गर्दै विजेता बन्न सफल भएका थिए।
प्रतियोगिताका विजेता तथा उपविजेता टोलीलाई ट्रफी, मेडल र प्रमाणपत्र प्रदान गरी सम्मान गरिएको थियो। समापन समारोहमा बोल्दै वक्ताहरूले खेलकुदले विद्यार्थीको प्रतिभा, अनुशासन, आत्मविश्वास तथा नेतृत्व क्षमता विकासमा महत्वपूर्ण भूमिका खेल्ने धारणा व्यक्त गरेका थिए। कार्यक्रममा विभिन्न विद्यालयका विद्यार्थी, शिक्षक, अभिभावक, खेलकुदकर्मी तथा सरोकारवालाहरूको उल्लेखनीय उपस्थिति रहेको थियो।
