पोखरा ।
राष्ट्रिय स्वतन्त्र पार्टी (रास्वपा) को प्रथम महाधिवेशनमा देखिएको दृश्यले देशको पूर्वाधार विकासको वास्तविक अवस्था उजागर गरेको छ। मञ्चबाट विकास र एक्सप्रेस वे का सपना प्रस्तुत भइरहँदा मैदानमा कार्यकर्ताले हिलो र असुविधा भोग्नुपरेको दृश्यले फरक सन्देश दिएको छ। यही सन्दर्भमा पोखराका युवा व्यवसायी प्रमेश पराजुलीले देशमा अझैसम्म सुविधासम्पन्न इभेन्ट सेन्टर को अभाव हुनु विडम्बनापूर्ण रहेको बताएका छन्। उनले रास्वपाको महाधिवेशनमा देखिएको अवस्थालाई देशको यथार्थ चित्रका रूपमा व्याख्या गरेका छन्।
पराजुलीले नेपालमा ठूलो क्षमताको बहुउद्देश्यीय कार्यक्रमस्थलको आवश्यकता औंल्याएका छन्। उनका अनुसार ८ देखि १० हजार दर्शक तथा सहभागी सहजै अट्ने, पर्याप्त पार्किङ सुविधा भएको र मौसमको प्रतिकूल प्रभाव नपर्ने आधुनिक संरचना देशमा अभावकै विषय बनेको छ। यस्ता पूर्वाधार निर्माण भए राजनीतिक महाधिवेशनदेखि सांस्कृतिक तथा सांगीतिक कार्यक्रमसम्म व्यवस्थित रूपमा सञ्चालन गर्न सकिने उनको विश्वास छ। साहित्यिक मेला, नाटक मञ्चन, फिल्म प्रिमियर, व्यापार प्रदर्शनी तथा अटो शो जस्ता विविध कार्यक्रमका लागि पनि यस्तो स्थल उपयोगी हुने उनले बताएका छन्।
शैक्षिक मेला, प्रविधि प्रदर्शनी, फेसन शो तथा ब्युटी पेजेन्टजस्ता कार्यक्रम सञ्चालन गर्न आधुनिक पूर्वाधार अपरिहार्य रहेको पराजुलीले बताएका छन्। उनका अनुसार राष्ट्रिय तथा अन्तर्राष्ट्रिय स्तरका अवार्ड समारोह, इन्डोर खेलकुद प्रतियोगिता र धार्मिक प्रवचनका लागि सुविधासम्पन्न इभेन्ट सेन्टर आवश्यक छ। कर्पोरेट क्षेत्रका एजीएम, नयाँ उत्पादन सार्वजनिक कार्यक्रम तथा अन्तर्राष्ट्रिय सम्मेलनहरू आयोजना गर्न पनि यस्तो संरचनाले सहजता प्रदान गर्ने उनको भनाइ छ। खाद्य तथा सांस्कृतिक महोत्सवजस्ता ठूला कार्यक्रमलाई समेत व्यवस्थित रूपमा सञ्चालन गर्न यस्ता पूर्वाधार प्रभावकारी हुने उनले उल्लेख गरे।
पर्यटकीय नगरी पोखरासँग देशमा खड्किएको यस्तो पूर्वाधार अभाव अन्त्य गर्ने क्षमता रहेको उनको विश्वास छ। सबै क्षेत्रका पोखरेली एकजुट भए आधुनिक र बहुउद्देश्यीय इभेन्ट सेन्टर निर्माणको सपना साकार हुन सक्छ, उनले भने। यस्ता दीर्घकालीन योजनाले पोखराको छविलाई थप उचाइमा पुर्याउने र पर्यटन क्षेत्रलाई नयाँ अवसर प्रदान गर्ने उनको दाबी छ। साथै, यस विषयमा व्यापक सार्वजनिक बहस र सरोकारवालाबीच छलफल अघि बढाउन उनले आग्रह गरेका छन्।
