प्युरी दोभानमा पर्यटन तथा होमस्टे प्रवर्द्धनको नयाँ उत्साह देखिएको छ। तनहुँ र स्याङ्जाको संगमस्थलमा आयोजित मेलिनियम ट्रेक परिचयात्मक तथा होमस्टे प्रवर्द्धन कार्यक्रममा स्थानीयवासी, पर्यटनकर्मी तथा सरोकारवालाको उत्साहजनक सहभागिता रहेको थियो। मेलिनियम ट्रेकद्वारा आयोजित उक्त कार्यक्रम शुक्लागण्डकी नगरपालिका वडा नं. १२ को आर्थिक सहयोगमा सम्पन्न भएको हो।
मेलिनियम ट्रेकका महासचिव हर्क गुरुङको सभापतित्वमा सम्पन्न कार्यक्रममा प्राध्यापक डा. श्रीकान्त खतिवडा, गण्डकी प्रदेश सभा सदस्य श्यामराजा महत, शुक्लागण्डकी नगरपालिकाका प्रमुख प्रशासकीय अधिकृत शिशिर पौडेल, वडा अध्यक्ष इन्द्र गुरुङ तथा पुतलीबजार ६ का वडा अध्यक्ष खेम गुरुङलगायत वक्ताहरूले पर्यटन प्रवर्द्धन, होमस्टे विकास र स्थानीय आर्थिक समृद्धिका सम्भावनाबारे आफ्ना धारणा व्यक्त गरेका थिए।कास्कीको दोबिल्लाबाट सुरु भई स्याङ्जासम्म फैलिएको मेलिनियम ट्रेकले डाँडागाउँ, प्युरी दोभान, जस्पुर, लामागाउँ र घरेटीजस्ता ग्रामीण बस्तीहरूलाई समेट्दै पर्यटन विकासको नयाँ सम्भावना बोकेको बताइएको छ।
कार्यक्रममा स्थानीय जनप्रतिनिधि, आमा समूह, टोल विकास संस्था, पर्यटन व्यवसायी तथा सर्वसाधारणको उल्लेखनीय उपस्थिति रहेको थियो। कार्यक्रममा मेलिनियम ट्रेकलाई गण्डकी प्रदेशकै आकर्षक पर्यटकीय गन्तव्यका रूपमा विकास गर्न सबै पक्षको सहकार्य आवश्यक रहेको जोड दिइएको थियो।
कार्यक्रमको सञ्चालन ट्रेकका सदस्य बालकुमार गुरुङले गर्नुभएको थियो भने स्वागत मन्तव्य खड्कविक्रम खाँडले व्यक्त गर्नुभएको थियो।
प्युरी दोभानबाट सुरु भएको पर्यटन प्रवर्द्धनको अभियानले मेलिनियम ट्रेकलाई राष्ट्रिय तथा अन्तर्राष्ट्रिय पर्यटकका लागि आकर्षक गन्तव्यका रूपमा स्थापित गर्ने अपेक्षा गरिएको छ।
