अन्तर्राष्ट्रिय ओलम्पिक सप्ताह २०२६ को अवसरमा आयोजित विभिन्न कार्यक्रमअन्तर्गत सम्पन्न निबन्ध लेखन प्रतियोगिताका विजयी विद्यार्थीहरूलाई हिल प्वाइन्टमा आयोजित विशेष समारोहबीच पुरस्कार तथा प्रमाणपत्र वितरण गरिएको छ।
कार्यक्रमका प्रमुख अतिथि राष्ट्रिय ओलम्पिक कमिटीका अध्यक्ष तेजबहादुर गुरुङले ओलम्पिक केवल खेलकुदमा मात्र सीमित नभई अनुशासन, उत्कृष्टता, मित्रता र सम्मानजस्ता जीवनोपयोगी मूल्यहरूको प्रवर्द्धन गर्ने माध्यम भएको बताउनुभयो। उहाँले यस्ता सिर्जनात्मक प्रतियोगितामार्फत विद्यार्थीहरूमा खेल संस्कृतिप्रति सकारात्मक सोच, नेतृत्व क्षमता तथा आत्मविश्वासको विकास हुने विश्वास व्यक्त गर्नुभयो।
कार्यक्रममा बोल्दै हिल प्वाइन्टका प्रधानाध्यापक दिवाकर जैसीले राष्ट्रिय ओलम्पिक कमिटीले अन्तर्राष्ट्रिय ओलम्पिक सप्ताहको अवसरमा सञ्चालन गरेका यस्ता कार्यक्रमले विद्यार्थीहरूमा खेलप्रतिको रुचिसँगै सिर्जनशीलता, अनुशासन र बौद्धिक क्षमताको विकास गर्न महत्वपूर्ण भूमिका खेलेको बताउनुभयो। उहाँले आगामी दिनमा पनि यस्ता कार्यक्रमलाई निरन्तरता दिनुपर्ने आवश्यकता औँल्याउनुभयो।
कार्यक्रममा निबन्ध लेखन प्रतियोगिताका विजेता विद्यार्थीहरूलाई पुरस्कार तथा प्रमाणपत्र प्रदान गरिएको थियो। साथै, प्रतियोगितामा सहभागी सम्पूर्ण विद्यार्थीहरूलाई बधाई ज्ञापन गर्दै उज्ज्वल भविष्यको शुभकामना व्यक्त गरिएको थियो।
