साइप्रस । वैदेशिक रोजगारीका सिलसिलामा साइप्रसमा रहेका तमु समुदायलाई एकताबद्ध गर्दै भाषा, धर्म, संस्कार, संस्कृति तथा मौलिक पहिचानको संरक्षण र प्रवर्द्धन गर्ने उद्देश्यका साथ तमु प्ये ल्हु संघ साइप्रस शाखा गठन गरिएको छ।
संघको १०औँ प्रवास शाखाका रूपमा गत फेब्रुअरी ५, २०२६ मा साइप्रसमा शाखा स्थापना गरिएको हो। शाखामार्फत साइप्रसमा रहेका नेपाली तथा तमु समुदायबीच आपसी सहकार्य, एकता र विभिन्न समस्यामा सहयोग पुर्याउने उद्देश्यले सात सदस्यीय कार्यसमिति चयन गरिएको जनाइएको छ।
नवगठित शाखाको अध्यक्षमा हेमा तमुस्यो चयन हुनुभएको छ। त्यसैगरी उपाध्यक्षमा निरज तमु, सचिवमा जानुका तमुस्यो, सहसचिवमा किसान तमु र निसान तमु, कोषाध्यक्षमा राधिका तमुस्यो तथा सहकोषाध्यक्षमा पृतम तमु चयन हुनुभएको छ।
शाखा गठनप्रति खुशी व्यक्त गर्दै तमु प्ये ल्हु संघ केन्द्रीय युवा समितिका अध्यक्ष तथा सल्लाहकार संयोजक सुकबहादुर सरुब्चह तमुले हेमा तमुस्योसहित सम्पूर्ण कार्यसमितिलाई बधाई दिँदै सफल कार्यकालको शुभकामना व्यक्त गर्नुभएको छ।
उहाँले विदेशमा रहेर पनि तमु समुदायको भाषा, धर्म, संस्कृति, परम्परा र मौलिक पहिचानको संरक्षणमा शाखाले प्रभावकारी भूमिका निर्वाह गर्ने विश्वास व्यक्त गर्नुभयो। साथै साइप्रसमा रहेका नेपालीहरूले भोग्ने विभिन्न समस्या तथा चुनौतीहरूको समाधानमा पनि शाखा महत्वपूर्ण माध्यम बन्ने अपेक्षा व्यक्त गर्नुभयो।
नवगठित शाखाले तमु समुदायबीच आपसी सद्भाव, सहकार्य र एकतालाई थप मजबुत बनाउँदै सांस्कृतिक पहिचानलाई अन्तर्राष्ट्रिय स्तरमा प्रवर्द्धन गर्न उल्लेखनीय योगदान पुर्याउने विश्वास गरिएको छ।
