पोखरा । प्रधानमन्त्री वालेन्द्र शाह नेतृत्वको वर्तमान सरकारले कार्यकालको पहिलो सय दिन पूरा गरेको छ । यस अवसरमा सरकारले आफ्नो सयदिने अवधिमा भएका प्रमुख उपलब्धिहरू सार्वजनिक गरेको छ । प्रधानमन्त्री तथा मन्त्रिपरिषद्को कार्यालयमा आयोजित पत्रकार सम्मेलनमा सरकारका प्रवक्ता तथा शिक्षा एवं खेलकुदमन्त्री सस्मित पोखरेलले उपलब्धिहरूको विवरण प्रस्तुत गरेका हुन् । सरकारले सुरुदेखि नै सयदिने कार्ययोजना बनाएर सोहीअनुसार काम अघि बढाएको उनले बताए ।
प्रवक्ता पोखरेलका अनुसार संघीय सरकारअन्तर्गत मन्त्रालयको संख्या घटाउनु सरकारको प्रमुख उपलब्धिमध्ये एक हो । रास्वपाको चुनावी प्रतिबद्धताअनुसार मन्त्रालयको संख्या १८ मा सीमित गरिएको उनले जानकारी दिए । यस निर्णयबाट राज्यकोषमा वार्षिक करिब २० अर्ब रुपैयाँसम्म बचत हुने सरकारको अनुमान छ । साथै, आवश्यकताभन्दा बढी रहेका प्रशासनिक संरचनालाई खारेज वा समायोजन गर्ने प्रक्रिया पनि अघि बढाइएको उनले बताए । यसबाट प्रशासनिक खर्च घट्नुका साथै सेवा प्रवाह थप प्रभावकारी हुने अपेक्षा गरिएको छ ।
त्यसैगरी, राजनीतिक दलसँग आबद्ध ट्रेड युनियन तथा विद्यार्थी संगठनहरू पनि खारेज गरिएको सरकारले जनाएको छ । प्रवक्ता पोखरेलले यस्ता सुधारात्मक कदमहरूले सुशासन र प्रशासनिक सुधारतर्फ सकारात्मक सन्देश प्रवाह गरेको बताए । प्रशासनिक बोझ कम गर्दै नागरिकलाई छिटो, सरल र प्रभावकारी सेवा उपलब्ध गराउने सरकारको लक्ष्य रहेको उनको भनाइ छ । यी निर्णयहरूले राज्यको कार्यसम्पादन क्षमता अझ सुदृढ हुने विश्वास सरकारले व्यक्त गरेको छ।
