रत्नचोक-८, पोखरास्थित सब्लाइम इङ्ग्लिस बोर्डिङ स्कुलमा साउन ७ गते बिहीबार येलो कलर सेलिब्रेसन डे उल्लासपूर्ण वातावरणमा सम्पन्न भएको छ।
विद्यालयको प्रिस्कुल तहका विद्यार्थीहरूको सहभागितामा आयोजित उक्त कार्यक्रममा बालबालिकाहरू पहेंलो रंगका आकर्षक पोशाकमा सजिएर सहभागी भएका थिए। कार्यक्रममा पहेंलो रंगसँग सम्बन्धित विभिन्न शैक्षिक तथा सिर्जनात्मक गतिविधि, गीत, नृत्य, चित्रकला, मनोरञ्जनात्मक खेल तथा रंग पहिचानसम्बन्धी अभ्यासहरू सञ्चालन गरिएको थियो। विद्यार्थीहरूले उत्साहका साथ सहभागिता जनाउँदै सिकाइलाई अझ रमाइलो र प्रभावकारी बनाएका थिए।
बालबालिकालाई रंगहरूको महत्त्वबारे जानकारी गराउने, उनीहरूको सिर्जनशीलता, आत्मविश्वास, सामाजिक व्यवहार तथा समूहमा सहकार्य गर्ने सीपको विकास गर्ने उद्देश्यले कार्यक्रम आयोजना गरिएको विद्यालयले जनाएको छ।
कार्यक्रममा विद्यालयका शिक्षक शिक्षिका तथा कर्मचारीहरूको सक्रिय सहभागिता रहेको थियो। उनीहरूको समन्वय र मार्गदर्शनमा कार्यक्रम सफलतापूर्वक सम्पन्न भएको थियो।
विद्यालय प्रशासनले यस्ता बालमैत्री, सिर्जनात्मक तथा व्यवहारिक कार्यक्रमहरूले विद्यार्थीहरूको सर्वाङ्गीण विकासमा महत्वपूर्ण योगदान पुर्याउने विश्वास व्यक्त गर्दै आगामी दिनहरूमा पनि यस्ता कार्यक्रमलाई निरन्तरता दिने जनाएको छ।
