- पोखरा । कपडा व्यवसायी एसोसिएसन कास्की, पोखराले चाडपर्वको अवसरमा शुभकामना आदान-प्रदान तथा कार्यालय उद्घाटन कार्यक्रम सम्पन्न गरेको छ।
पोखराको चिप्लेढुंगास्थित निभा गल्लीमा स्थापना गरिएको एसोसिएसनको कार्यालयको उद्घाटन पूर्वअध्यक्ष जनकराज पराजुलीले दीप प्रज्वलन गरेर गरेका थिए।
कार्यक्रममा एसोसिएसनका अध्यक्ष रामचन्द्र तिमिल्सिनाले सहभागीलाई स्वागत गर्दै कपडा व्यवसायीको हकहित संरक्षण, व्यावसायिक एकता र व्यवसायको प्रवर्द्धनमा सहकार्य गर्दै अघि बढ्ने बताए।
कार्यक्रममा संस्थापक अध्यक्ष रामजीप्रसाद बास्तोला, महासचिव नारायण अधिकारी, निवर्तमान अध्यक्ष लेखनाथ पौडेल तथा पूर्वअध्यक्षहरू गजेन्द्रमान श्रेष्ठ, नवीन नापित र यामनाथ तिमिल्सिना, सल्लाहकार लक्ष्मण न्यौपाने र हरि पन्तसहित पदाधिकारी तथा सदस्यहरूले एकआपसमा चाडपर्वको शुभकामना आदानप्रदान गरेका थिए।
कार्यालय उद्घाटन गर्दै पूर्वअध्यक्ष पराजुलीले संस्थाको कार्यालयले कपडा व्यवसायीबीच आपसी एकता, समन्वय र सहकार्य बढाउन सहयोग पुग्ने बताए।
व्यवसायीका साझा समस्या पहिचान गरी समाधानका लागि सामूहिक पहल गर्न तथा व्यवसायको विकास र प्रवर्द्धनमा संस्थाले प्रभावकारी भूमिका खेल्नुपर्नेमा उनले जोड दिए।
कार्यक्रममा कपडा व्यवसायको वर्तमान अवस्था, बजारमा बढ्दो प्रतिस्पर्धा र व्यवसाय सञ्चालनका चुनौतीबीच व्यवसायी एकजुट भएर अघि बढ्नुपर्ने आवश्यकता औँल्याइएको थियो।
उपभोक्ताको बदलिँदो मागअनुसार व्यावसायिक सेवा सुधार गर्दै व्यवसायलाई व्यवस्थित र प्रतिस्पर्धी बनाउन आपसी सहकार्य महत्त्वपूर्ण हुने सहभागीहरूको भनाइ थियो।
चिप्लेढुंगास्थित निभा गल्लीमा कार्यालय स्थापना भएपछि संस्थाका गतिविधि सञ्चालन, व्यवसायीबीच समन्वय र उनीहरूका साझा विषयमा छलफल गर्न सहज हुने अपेक्षा गरिएको छ।
