पोखरा । बडादशैँको फूलपातीका अवसरमा पोखरामा बाजागाजासहित शोभायात्रा निकालिएको छ।
जिल्ला प्रशासन कार्यालय कास्कीको आयोजनामा शनिबार मानव अधिकार चोकदेखि बिन्ध्यवासिनी मन्दिर परिसरसमम्म फूलपाती शोभायात्रा निकालिएको हो।
कास्कीका प्रमुख जिल्ला अधिकारी कुमानसिंह गुरुङको प्रमुख उपस्थितिमा सम्पन्न शोभायात्रामा जिल्ला सुरक्षा समितिका पदाधिकारी, नेपाली सेना, नेपाल प्रहरी, सशस्त्र प्रहरी बल नेपालका अधिकृत तथा जवान र सर्वसाधारण सहभागी थिए।
शोभायात्रापछि कस्केली नागरिकको सुख, शान्ति र समृद्धिको कामना गर्दै प्रमुख जिल्ला अधिकारी गुरुङ, जिल्ला प्रहरी कार्यालय कास्कीका प्रमुखलगायत सुरक्षा निकायका अधिकृतले बिन्ध्यवासिनी मन्दिरमा पूजाआजा गरेका थिए।
सोही अवसरमा नवदुर्गा भगवतीलाई चारवटै सुरक्षा निकायका तर्फबाट सलामी अर्पण गरिएको थियो। त्यसपछि परम्पराअनुसार बिन्ध्यवासिनी मन्दिरमा फूलपाती भित्र्याउने कार्यक्रम सम्पन्न भएको जिल्ला प्रशासन कार्यालयले जनाएको छ।
फूलपाती भित्र्याउने परम्परालाई निरन्तरता दिँदै आयोजना गरिएको कार्यक्रममा शान्ति सुरक्षा कायम राख्दै नागरिकलाई भयरहित वातावरणमा चाडपर्व मनाउने व्यवस्था गर्न सबैको सहयोग अपेक्षा गरिएको थियो।
यस अवसरमा जिल्ला प्रशासन कार्यालय कास्कीले विजयादशमी तथा फूलपातीको शुभकामना व्यक्त गर्दै सबैलाई हर्षोल्लासपूर्वक चाडपर्व मनाउन आग्रह गरेको छ।
