काठमाडौं । नेपाली सेनाले २०३२ सालदेखि सञ्चालन गर्दै आएको सैनिक कल्याणकारी कोषमार्फत हालसम्म करिब १० लाख हिताधिकारीले शिक्षा, स्वास्थ्य, रोजगारी तथा आर्थिक सहुलियतका सुविधा प्राप्त गरेका छन्।
कोषमार्फत करिब ४० हजार विद्यार्थी सैनिक विद्यालयमा अध्ययनरत छन् भने थप ३५ हजार विद्यार्थीलाई वार्षिक २५ हजार रुपैयाँका दरले छात्रवृत्ति प्रदान गरिँदै आएको छ।
त्यस्तै, स्वास्थ्य सेवाबाट वार्षिक करिब पाँच लाख हिताधिकारी लाभान्वित भएका छन् भने एक लाख १० हजारभन्दा बढी सैनिकले सहुलियतपूर्ण ऋण प्राप्त गरेका छन्। कोषले सीपमूलक तालिम, रोजगारी, उद्यमशीलता तथा सामाजिक सुरक्षाका कार्यक्रमसमेत सञ्चालन गर्दै आएको छ।
कोषको दीर्घकालीन आयस्रोत वृद्धि गर्न रुपन्देहीको सैनामैनामा करिब १० मेगावाट क्षमताको सौर्य ऊर्जा परियोजना सञ्चालन गर्ने तयारी भइरहेको छ। कोषले नेपाल सरकारलाई वार्षिक करिब ७० करोड रुपैयाँसम्म कर बुझाउँदै आएको छ।
