नेकपा एमालेका नेता रघुजी पन्तले नेपालका खानीहरुमा रहेको निर्माणमुखी सामग्री निकासी गर्नसक्ने गरी विधेयक ल्याउन नहुने बताउनुभएको छ ।
बिहीवार प्रतिनिधि सभा बैठकमा भएको निर्माणमुखी सामग्री व्यवस्थापन तथा नियमन विधेयक, २०८० माथिको छलफल बोल्दै नेता पन्तले यस्तो बताउनुभएको हो । उहाँले विधेयकमा सरकारले नेपालको खोला नदीमा भएका गिट्टी,बालुवा,ढुङ्गा जस्ता निर्माण सामग्री निकाय गर्न पाउने व्यवस्था राखेको भन्दै निर्माणजन्य सामग्री विदेशमा निर्यात गर्न पाउने विषय तत्काल हटाउन माग गर्नुभयो । उहाँले मुलुकभित्र रहेका निर्माणजन्य सामग्रीहरु विदेशमा निर्यात गर्ने भन्दा पनि मुलुकभित्रै खपत गर्नुपर्ने बताउनु भयो । उहाँले विधेयकको दफा ४२ मा सरकारले चाहेमा निकासीमा रोक लगाउन सक्ने भन्ने शब्दले निर्माण सामग्रीको स्रोतबाट गिट्टी,वालुवा,ढुङ्गा जस्ता निर्माण सामग्री निकासी गर्नसक्ने बुझिएकाले हटाउन माग गर्नुभयो । उहाँले सर्वोच्च अदालतले निर्माण सामग्री विदेश निकाय गर्न रोक लगाएकाले त्यो विषयमा सरकारले कानून बनाउन नहुने बताउनु भयो । उहाँले नेपाल आफैँ विकाउन्मुख देश भएकाले धेरै पूर्वाधारहरु बनाउनुपर्ने अवस्था रहेको भन्दै सडक पूर्वाधार, जलविद्युत, पुल बनाउन आफैँलाई निर्माण सामाग्री आवश्यक हुने बताउनु भयो । उहाँले नाफाको लागि निकासी गर्न छुट दिने हो भने भविष्यमा आवश्यक परेको खण्डमा यस्ता निर्माण सामग्री नेपालले पाउन नसक्ने बताउनु भयो ।
उहाँले भन्नुभयो,‘निर्माणसँग सम्बन्धित रोड,गिट्टी वालुवाको प्रयोग ठिक ढङ्गले गर्नुपर्छ । सही तरिकाले प्रयोग गरियो भने सधैँ प्राप्त हुन्छ । बेठिक ढङ्गले प्रयोग गरियो भने समाप्त भएर जान्छ पुनः उत्पादन गर्न सकिँदैन । यो विधेयकको दफा ४२ मा सरकारले चाहेमा निकासीमा रोक लगाउन सक्ने भन्ने छ । यसले यस्तो स्रोत निकासी गर्नसक्ने भन्ने बुझिन्छ । यो विषय सर्वोच्च अदालतले रोक लगाएको छ । सर्वोच्च अदालतमा विचाराधिन रहेकाले सरकारले कानून ल्याउन मिल्दैन । मेरो पनि मान्यता के छ भन्दा निर्माण सामग्री नेपालभित्र प्रयोग गर्ने हो । नेपाल आफैँ विकाउन्मुख देश हो । धेरै पूर्वाधारहरु बनाउनुपर्छ । सडक पूर्वाधार, जलविद्युत, पुल बनाउन यी सामग्री चाहिन्छ । अहिले नाफाको लागि निकासी गर्न छुट दियौं भने भोली आवश्यक परेको खण्डमा यस्ता निर्माण सामग्री नेपालले पाउँदैन । त्यसैले यस्तो कानून हटाउनुपर्छ । निर्माणमुखी सामग्री प्रयोग गर्दा दीर्घकालिन स्रोतको रुपमा हेर्नुपर्छ । हाम्रो वातावरण र जलवायु परिर्वतनलाई थप असर पु¥याउने कुरामा सचेत हुनुपर्छ । हरेक पटक आउँछ । यो छिमेकी देशको दबाब हो की जस्तो पनि लाग्छ । उनीहरुलाई अत्याधिक निर्माण सामग्री आवश्यक भएको छ ।’
उहाँले निर्माणमुखी सामग्री प्रयोग गर्दा दीर्घकालिन स्रोतको रुपमा हेर्नुपर्नेमा जोड दिनुभयो । उहाँले वातावरण र जलवायु परिवर्तनलाई थप असर पु¥याउने कुरामा सचेत भएर निर्माणजन्य सामग्रीको प्रयोगमा ध्यान दिन जरुरी रहेको बताउनु भयो । उहाँले छिमेकी देशको दबाबले हरेक पटक निर्माणजन्य सामग्री निकासीको विषय आउने गरेको बताउनु भयो ।
