शुन्य समयमा बोल्दै सांसदहरु

प्रतिनिधि सभा बैठकको शुन्य समयमा बोल्दै सांसदहरुले सहकारी ठगि प्रकरणमा गृहमन्त्रीको नाम जोडिएको भन्दै गृहमन्त्रीको राजीनामाको माग गरेका छन् । 

शुक्रवारको प्रतिनिधि सभा बैठकमा बोल्दै सांसदहरुले सहकारी ठगि प्रकरणमा गृहमन्त्री रवि लामिछानेको नाम जोडिएकोले गृहमन्त्रीले राजीनामा दिनुपर्ने माग गरेका हुन् । बैठकमा बोल्दै प्रतिनिधि सभा सदस्य अजयकुमार चौरसियाले गृहमन्त्री लामिछानेको राजीनामा माग गर्नुभयो । उहाँले सहकारी ठगि र सुन तस्करीमा मुछिएका व्यक्तिहरु सरकारमा रहेको भन्दै दुवैको राजीनामाको माग गर्नुभयो । उहाँले सरकारले किसानलाई उन्नत जातको बिउ, मलखाद, सिंचाइँको प्रवन्ध गर्न नसकेको बताउनु भयो । 

उहाँले भन्नुभयो – ‘सहकारी पीडितहरु आन्दोलनमा हुनुहुन्छ । सरकार सहकारीबाट ठगि एवं सुन तस्करीमा मुछिएका व्यक्तिहरु सरकारमा हुनुहुन्छ । म अविलम्व राजीनामा दिन माग गर्न चाहन्छु । कृषि, रोजगार, स्वास्थ्य र शिक्षाको उन्नति बिना कुनैपनि राष्ट्रको उन्नति हुन सक्दैन । तैपनि सुधारको केही गर्न नसकेको अवस्था छ । नचाहेको अवस्था पनि छ । किसानलाई उन्नत जातको बिउ, मलखाद, सिचाइँको समुचित प्रवन्ध गर्न नसक्ने सरकार छ ।’

प्रतिनिधि सभा सदस्य अञ्जनी श्रेष्ठले सुन काण्ड र सहकारी काण्डका मन्त्रीहरुको नाम मिडियाबाट मेटाउन गठबन्धन भएको टिप्पणी गर्नुभयो । उहाँले विवादित विषयमा मन्त्रीहरुले सदनलाई स्पष्ट पार्नुपर्ने बताउनु भयो । 
उहाँले भन्नुभयो – ‘सुन काण्ड, सहकारी काण्डका मन्त्रीहरुको नाम मिडियाबाट कसरी मेटाउने भन्ने बारेमा पो गठबन्धन भएको रहेछ । यि मन्त्रीहरुले यो सदनलाई स्पष्ट जानकारी गराउनुपर्ने कि नपर्ने ? म प्रश्न गर्दछु ।’

प्रतिनिधि सभा सदस्य अनिशा नेपालीले बैंकहरुले ऋण लगानी गरेवापत चर्को ब्याज असुली गरिरहेको भन्दै यसतर्फ सरकारको ध्यानाकर्षण गराउनु भयो । 
उहाँले भन्नुभयो – ‘बैंक, वित्तिय संस्थाहरुले जथाभावि रुपमा लगानी गरेर ऋणीलाई उठिबास लगाएको सर्वविदित नै छ । साँवा, ब्याज फिर्ता पाउँ भनि यसका विरुद्ध पीडितहरुले आन्दोलन गरीरहेका छन् । एकातिर कुनै व्यक्तिले कपाली तमसुक गरी ऋण दिएमा दश प्रतिशत ब्याज असुली गर्न पाउने भनी कानूनी व्यवस्था छ । तर अर्कोतर्फ सबै बैंकले ऋण लगानी गरेवापत् चर्को व्याज असुल मात्र गरेका छैनन् । सेवा शुल्क भनेर रकम असुल गर्ने र ब्याजलाई साँवामा परिणत गरेर जथाभावि ब्याजमाथि ब्याज लगाउने अपराधिक कामहरु गरेका छन् । यस्तो मनपरीतन्त्रलाई तत्काल नियन्त्रण गर्न र पीडितहरुको माग सम्बोधन गर्न सरकारकासँग जोडदार माग गर्दछु ।’

प्रतिनिधि सभा सदस्य अम्बिका बस्नेतले बालकुमारी घटनाको छानविन समिति संसदमा पेश नभएको भन्दै असन्तुष्टि व्यक्त गर्नुभयो । 
उहाँले भन्नुभयो – ‘बालकुमारी घटनाका हत्यारालाई पत्ता लगाउन छानविन समिति बन्यो । छानविन समितिको रिपोर्ट आयो त्यो प्रतिवेदन यहाँ पेश भएन । हत्यारालाई कारबाही भएन । अनुसन्धानको घेरामा भएका मन्त्रीहरुलाई बर्खास्त गर्नुपर्छ भनेर बारम्बार संसदमा अवरोध भयो तर अहिले ?’ 

प्रतिनिधि सभा सदस्य अर्जुननरसिंह केसीले देश तस्कर र शक्तिशालीहरुको लुटको महाजालोमा फसेको बताउनु भयो । उहाँले विगतमा ३३ किलो सुन प्रकरणको छानविन समितिको प्रतिवेदन गायब भएको भन्दै अहिले आएको प्रतिवेदन नहराओस् भनि सचेत गराउनु भयो । उहाँले दोषी उपर कारबाही हुनुपर्ने बताउनु भयो । 
उहाँले भन्नुभयो – ‘देश तस्कर र शक्तिशालीहरुको लुटको महाजालोमा फसेको छ । ३३ किलो सुन छानविन समितिको प्रतिवेदन गायव गरिएको छ । अहिलेपनि प्रतिवेदन आएको छ त्यो हराउने काम नहोस् । जो दोषि छन्, जो संलग्न छन् तिनीहरुमाथि सम्पूर्ण रुपले कारबाही होस् । एनसेल काण्डको प्रतिवेदन सार्वजनिक गरियोस् । यसलाई लुकाएर नराखियोस् ।’

प्रतिनिधि सभा सदस्य कुसुनदेवी थापाले सहकारीको रकम अपचलनको आरोप लागेका व्यक्ति नै सरकारमा रहेको भन्दै दुधको साक्षि बिरालो राखिएको टिप्पणी गर्नुभयो ।

यसका साथै शुन्य समयमा बोल्ने अन्य सांसदहरुले आ–आफ्नो क्षेत्रको विकास निर्माणका कामको सम्बन्धमा कुरा राख्नुभएको थियो ।