पोखरा ।
माघे पर्वका अवसरमा विभिन्न माध्यमबाट शुभकामना आदान प्रदान भएको छ । विभिन्न संघ संस्था, क्लब, आमा समूह, धार्मिक संघसंस्था लगायतले शुभकामना साटासाट समेत गरेका छन् ।
माघ महिनाको पहिलो दिन माघे संक्रान्ति पर्व मनाउने दिन विभिन्न धार्मिक क्रियाकलापमा भाग लिएर नेपालीहरुले पर्व मनाएका छन् । मंगलबार देशभरका विभिन्न क्षेत्रमा स्नान, जप, तप, ध्यान तथा साधना, दान गरेर मनाउने तयारी देखिएको छ ।
सूर्य धनु राशिबाट मकर राशिमा प्रवेश गर्ने भएसँगै माघ १ गतेलाई मकर संक्रान्ति भनिदै आएको छ । माघी पर्वको अवसरमा आज मंगलबार देशभर सार्वजनिक बिदा समेत दिएको छ ।
दिन लामो र रात छोटो हुँदै जाने भएकाले माघे पर्वलाई साउने संक्रान्तिको ठिक विपरित मानिन्छ । सूर्य उत्तरायण सुरु हुने दिनको स्नान, जप, तप, ध्यान तथा साधना, दान गर्नाले पुण्य मिल्ने विश्वास गरिन्छ ।
आजको दिन विभिन्न धार्मिक तीर्थस्थलहरु देवघाट, त्रिशूली, कालीगण्डकी, वाग्मती, इन्द्रावती, त्रिवेणी, गुल्मीको रिडी लगायतका स्थानमा भक्तजनहरुले स्नान गरेर धर्म कमाउने विश्वास गरिँदै आएको छ । विभिन्न स्थानमा विशेष मेलासमेत लाग्ने गर्छ ।
माघे संक्रान्तिको दिन घ्यु, चाकु, तिलका परिकार, खिचडी, सखरखण्ड, तरुल लगायतका परिकार खानाले निरोगी हुने जनविश्वास रहेको छ । तराईवासीले माघ १ गतेलाई नहान अर्थात् नुहाउने पर्वका रुपमा मनाउँछन् । बिहानै तीर्थस्थलमा गई स्नान गरेर तिल दान गर्नाले सुन दान गरे सरहको पुण्य प्राप्त हुने धार्मिक विश्वास छ ।
आजका दिन शरीरमा तिलको तेलले मालिस गर्दा दूषित पदार्थ बाहिर निस्कन्छ भन्ने विश्वास छ । शरीरका नाडी, स्नायुमण्डल र हड्डीलाई तिलको तेल मालिसबाट सुदृढ र स्वस्थ राख्न सकिने आयुर्वेद शास्त्रीय मान्यता समेत रहेको छ ।
