पोखरा । अमेरिकाको दक्षिणी क्यालिफोर्नियामा अझै पनि डढेलोको उच्च जोखिम रहेको बताइएको छ । अग्नि नियन्त्रकले डढेलोसँग लड्न जारी राखेका छन् ।
अमेरिकी राष्ट्रिय मौसम सेवाले लस एन्जलस क्षेत्रमा लागेको भीषण डढेलोले कम्तीमा २५ जनाको मृत्यु भएको बताएको छ ।
डढेलोले १२ हजार तीन सय भन्दा बढी संरचना नष्ट गरेको छ । स्थानीय अधिकारीका अनुसार डढेलोसँग सम्बन्धित कम्तीमा २६ जना अझै पनि बेपत्ता छन् ।
क्यालिफोर्नियाको वन तथा अग्नि सुरक्षा विभाग (क्याल फायर) काअनुसार बुधबार बिहानसम्म दुई प्रमुख जङ्गली आगो, इटन र प्यालिसेड्स क्रमशः ४५ प्रतिशत र १९ प्रतिशत मात्र नियन्त्रणमा आएका थिए ।
गत हप्ता मंगलबार साँझ लागेको घातक इटन आगलागीले अल्टाडेना र पासाडेना नजिकै १४ हजार एक सय १७ एकड (५७दशमलव१ वर्ग किलोमिटर) जमिन जलाएको छ ।
लस एन्जलस क्षेत्रको सबैभन्दा ठूलो सक्रिय जङ्गली आगो, प्यालिसेड्स आगलागीले एक हप्तामा २३ हजार सात सय १३ एकड (९५दशमलव९६ वर्ग किलोमिटर) जलाइसकेको छ ।
