पोखरा । विश्व शान्तिको कामना गर्दै सम्पूर्ण राष्ट्रप्रेमी युवा पोखराले बिहीबार पोखरास्थित अन्तर्राष्ट्रिय झण्डा पार्कमा दीप प्रज्वलन गरेको छ ।
पृथ्वी हाम्रो घर हो भन्ने नाराका साथ आयोजित कार्यक्रममा पोखरा महानगरपालिका प्रमुख धनराज आचार्यसमेत सहभागी थिए ।
उनीहरुले बुद्धको भूमिबाट युद्धको अन्त्य होस्, विश्वमा भइरहेको प्राकृतिक विपद् र त्यसबाट पुगेको मानवीय तथा भौतिक क्षतिको न्यूनीकरणको कामना समेत गरेका थिए ।
विपदबाट ज्यान गुमाएका मृतकप्रति श्रद्धाञ्जली, विस्थापित र अंगभंग भएका र भौतिक क्षति बेहोरेकाहरुप्रति उनीहरुले सहानुभूति प्रकट गरे ।
कार्यक्रमको संयोजन राष्ट्रप्रेमी युवाका संयोजक देवेन्द्रराज सुवेदी र सहसंयोजक सुदीप शर्मा पौडेल र दीपकबहादुर गोदारले गरेका थिए भने रामराज सुवेदी र दुर्गा सुवेदी सहभागी थिए ।
अभियानका सदस्य उत्तमप्रसाद पौडेलले आफ्नो शोक मन्तव्य राखेको कार्यक्रमको सञ्चालन बज्रराज अधिकारीले गरेका थिए ।
