पोखरा । कास्कीका ३५ जना स्थायी शिक्षकले शुक्रबार सामूहिक राजीनामा दिएका छन् । सरकारले हालै ल्याएको अध्यादेशको विरोध गर्दै उनीहरुले शिक्षा विकास तथा समन्वय इकाईमार्फत शिक्षा मन्त्रालयमा राजीनामा बुझाएका हुन् ।
२०७५ चैत ४ गतेपछि स्थायी भएको शिक्षकले अध्यादेशप्रति असन्तुष्टि जनाएका हुन् । राजीनामा स्वीकृत नहुँदासम्म पठनपाठन नरोक्ने उनीहरुले स्पष्ट पारे ।
सरकारले गरेको निर्णयबाट पर्ने आर्थिक र मानसिक मर्का सहन नसकेर सामूहिक राजीनामा पेस गरेको शिक्षकहरुको तर्फ छ ।
शक्षकमाथि सरकारले अन्यायपूर्ण व्यवहार गरेको उनीहरुको जिकिर छ । उनीहरुले प्राकृतिक न्यायको सिद्धान्त विपरित भूतप्रभावी कानुनको निर्माण गरी अध्यादेश जारी गरेको आरोप लगाए ।
कास्कीको अन्नपूर्ण गाउँपालिका वडा नं ९ स्थित भगवती माविका शिक्षक कीर्तिराज ढकालले शिक्षकलाई गुदपाक देखाएर बोलाउने र गोबर खुवाएर लखेट्न सरकार उद्यत भएको भन्दै दुःखेसो पोखे ।
अध्यादेशको कार्यान्वयनले सेवा प्रवेशको समयमा भएका व्यवस्थालाई समेत उल्ट्याई करिब छ वर्ष खाइपाई आएको तलबबाट समेत हिसाब गरी निश्चित प्रतिशत निवत्तिभरण कोषमा दाखिला गर्नुपर्ने उनको जिकिर छ ।
शिक्षा विकास तथा समन्वय इकाई प्रमुख लोकनाथ आचार्यले शिक्षकका राजीनामा पत्र सम्बन्धित निकायमा पठाउने प्रतिवद्धता जनाए ।
आजै नेपाल शिक्षक संघ कास्कीले विज्ञप्ति प्रकाशित गरी सरकारले हालै ल्याएको अध्यादेशप्रति आपत्ति जनाउँदै पुनः आन्दोलन गर्ने चेतावनी दिएको छ ।
बिहीबार नेपाल शिक्षक महासंघ कास्कीले पनि विज्ञप्ति प्रकाशित गरी अध्यादेशको विरोध गरेको थियो ।
