हुम्ला । हुम्लामा ट्याक्टर दुर्घटना हुँदा एक जनाको मृत्यु भएको छ भने तीन जना घाइते भएका छन् ।
मृत्यु हुनेमा चंखेली गाउँपालिका वडा नं १ का करिब ३५ वर्षीया तुल्या बोहरा छन् ।
घाइते हुनेमा ४० वर्षीय मानबहादुर बोहरा, ४५ वर्षीया धना बोहरा र १० वर्षका चरी बोहरा छन् । जसमा दुई जनाको अवस्था गम्भीर छ ।
उनीहरुको हेलिकप्टरबाट उद्वारका लागि पहल भइरहेको हुम्लाका प्रमुख जिल्ला अधिकारी नारायण पाण्डेले जानकारी दिए ।
जिल्लाको चंखेली गाउँपालिका वडा नं ३ को लोतीबाट नुन बोकेर चंखेली-१ बोहरावाडातर्फ जाँदै गरेको लु४त ७७२० नम्बरको ट्याक्टर दुर्घटना भएको प्रहरीले जनाएको छ ।
दुर्घटनाको कारण खुल्न नसकेको र थप अनुसन्धान भइरहेको प्रहरीले जनाएको छ ।
