पोखरा । रियालिटी शो मेरो भ्वाइस युनिभर्स र मेरो डान्स युनिभर्सको सिजन-२ को पोखरा अडिसन आगामी फागुन १६ र १७ गते हुने भएको छ । अडिसन पोखरा बहुमुखी क्याम्पसमा हुनेछ ।
इन्ट्रा-नेशनल वेलफेयर एण्ड सपोर्ट फाउण्डेसन अफ अमेरिकाले रियालिटी शो आयोजना गरेको हो । विश्वभर रहेका नेपालीको गायन र नृत्य क्षेत्रका उत्कृष्ट प्रतिभा पहिचान गर्नका लागि यी दुवै रियालिटी शो अघि बढाइएको आयोजकले जनाएको छ ।
फाउण्डेसनका अनुसार दोस्रो संस्करणका लागि युरोप महादेशमा बेलायत र पोर्चुगल, पूर्वी एसियाका लागि थाइल्याण्ड, हङकङ र जापान, मध्यपूर्वका लागि दुबई र कतार, अष्ट्रेलियाका लागि सिड्नी, भारतका लागि सिलिगुरी र मुम्बई तथा नेपालका लागि विर्तामोड, नेपालगञ्ज, पोखरा र काठमाडौंमा अडिसन हुनेछ ।
फाउण्डेसनका कार्यकारी निर्देशक सिएम भट्टराईले अमेरिकाबाट भर्चुअल माध्यमबाट संवोधन गर्दै नेपाली कला संस्कृतिका माध्यमबाट सबैलाई एउटै सूत्रमा जोड्नका लागि र नेपाली भाषी प्रतिभाहाई चिनाउन यस्तो खालको रियालिटी शो आयोजना गरिएको बताए ।
‘हाम्रो कला, संस्कृति, संस्कारजस्ता कुरालाई नयाँ पुस्तालाई पुस्तान्तरण गर्न पनि यो रियालिटी शोले महत्वपूर्ण भूमिका खेल्नेछ’, उनले भने ।
फाण्डेसनका गण्डकी प्रदेश प्रमुख तथा गायक राजेश बर्देवाले नेपाली संस्कृति र साँस्कृतिक पहिचानलाई संरक्षण, संवद्र्धन र उत्थान गर्ने उद्देश्य बताए ।
सहभागी हुन चाहने प्रतिस्पर्धीले फाउण्डेसनको वेभसाइट इन्ट्रा फाउण्डेसन डट ओआरजीबाट आवेदन दिन सक्ने छन् ।
विश्वभरिबाट स्थलगत अडिसनमा छनोट भएका भ्वाइसका लागि एक सय बीस र डान्सका लागि एकसय बीस गरी दुई सय चालिस जनालाई प्रतिस्पर्धाका लागि काठमाडौँ लगिनेछ ।
साउनको अन्तिम साता काठमाडौँमा हुने फिनालेमा दुबै शोका विजेतालाई एक करोड नेपाली रुपैयाँ नगद पुरस्कार स्वरुप प्रदान गरिने छ । यस्तै दोस्रो हुनेलाई २५ लाख र तेस्रो हुनेलाई १० लाख रुपैयाँ पुरस्कार प्रदान गरिने आयोजकले जनाएको छ ।
पोखरामा भएको मिट एण्ड ग्रीट कार्यक्रममा फाउण्डेसनका कास्की प्रमुख तथा कलाकार किसान सेवाले स्वागत र हिमाली साँस्कृतिक परिवारका अध्यक्ष ज्ञानबहादुर थापा, कलाकार तथा समाजसेवी लक्ष्मणश्री लगायतले बोलेका थिए ।
सन् २०२३ मा यी दुवै रियालिटी शोको पहिलो सिजन सफलतापूर्वक सम्पन्न भइसकेको छ । मेरो भ्वाइस युनिभर्स सिजन-२ का लागि वरिष्ठ गायक दीप श्रेष्ठ, संगीतकार सुरेश अधिकारी, गायक शिव परियार र पुष्पन प्रधान, गायिका अञ्जु पन्त र तृष्णा गुरुङ निर्णायक (जज) को भूमिकामा छन् ।
यसैगरी मेरो डान्स युनिभर्स सिजन २ को जजमा वरिष्ठ कलाकार मिथिला शर्मा, नायक दीलिप रायमाझी, चर्चित अभिनेत्री शिल्पा मास्के, चर्चित कोरियोग्राफर शंकर विसी, कविराज गहतराज र किरण थापा छन् । दुवै शोका लागि चर्चित कार्यक्रम प्रस्तोता रीमा विश्वकर्मा, नरेश भट्टराई, राजा राजेन्द्र पोखरेल र नम्रता श्रेष्ठ छन् ।
