पोखरा । पोखरा महानगरपालिका वडा नं. ५ ले ६०औँ अन्तर्राष्ट्रिय जातीय विभेद उन्मूलन दिवसमा कानूनी सचेतना तथा अन्तरक्रिया कार्यक्रम आयोजना भएको छ ।
कार्यक्रम उद्घाटन गर्दै वडाध्यक्ष विष्णुप्रसाद बरालले जातीय विभेद उन्मूलनका लागि समाजमा भएका सबै नागरिकको दायित्व तथा भूमिका उत्तिकै महत्वपूर्ण हुने बताए ।
उनले जातीय विभेद उन्मूलनका लागि उत्पीडित समुदाय मात्र होइन सबै टोल विकास संस्था, आमा समूह र सामाजिक व्यक्तित्वका बीचमा लगियो भनेमात्र कार्यक्रमले सार्थकता पाउने दावी गरे ।
कानूनमा धेरै कुराको व्यवस्था गरिरहँदा त्यो अनुसारको समाज निर्माण हुन नसकेको भन्दै अहिले पनि जातीय विभेदका घटना घटिरहेकोले एउटा मानिसले अर्को मानिसलाई विभेद गर्ने कुरा स्वीकार गर्न नसकिने प्रष्ट पारे।
जातीय विभेद उन्मूलन गर्नको लागि सबैले हातेमालो गर्न जरुरी भएको उनको भनाइ थियो । वर्तमान संविधानले धेरै अधिकार सुनिश्चित गरेको वडाध्यक्ष बरालले बताए ।
विभिन्न ठाउँमा प्रतिनिधित्वको सुनिश्चितता संविधानले गरेको भए पनि त्यो पर्याप्त भने नभएको उनले स्पष्ट पारे ।
आवश्यकताका आधारमा संविधानमा संशोधन गरेर थप अधिकार प्राप्त गर्न सकिने वडाध्यक्ष बरालले उल्लेख गरे ।
अहिले पुरानो व्यवस्था फर्काउनको लागि गणतन्त्र विरोधीले केही चलखेल भइरहेको भए पनि त्यो सम्भव नभएको भन्दै उनले त्यस्ता कुरामा नअल्मलिन आग्रह गरे ।
कार्यक्रममा वडा सदस्यद्वय हरिमाया बिक र कल्पना भुवाजी क्षेत्री, सामाजिक अभियन्ता हरि सुनार, वडासचिव लक्ष्मण शर्मालगायतले अन्तर्राष्ट्रिय जातीय विभेद उन्मूलन दिवसका बारेमा बोलेका थिए ।
कानुनी सचेतना कार्यक्रमको सहजीकरण अधिवक्ता शिव सुनारले गरेका थिए ।
कार्यक्रममा पोखरा ५ का टोल विकास संस्था, आमा समूहका प्रतिनिधिसहित विभिन्न सामाजिक व्यक्तित्व सहभागी थिए ।
संयुक्त राष्ट्रसङ्घले सन् १९६५ मा जातीय विभेद उन्मूलनसम्बन्धी महासन्धि पारित गरेको थियो । त्यसयता हरेक वर्ष मार्च २१ लाई विश्वभरी जाति तथा रङ्गभेद उन्मूलन दिवसका रूपमा मनाउने गरिन्छ । राष्ट्रसङ्घले पारित गरेको जाति तथा रंगभेदविरुद्धको महासन्धी नेपालले सन् १९७१ मा अनुमोदन गरेको थियो ।
