पोखरा । गत फागुन २९ गते फागुपूर्णिमाको दिन पोखराको फेवाताल फुटट्रयाकमा एक व्यक्तिलाई खुकुरी, हेल्मेट प्रहारसँगै कुटपिट गरी फरार भएका चार जना युवकलाई कास्की प्रहरीले नियन्त्रणमा लिएको छ ।
पक्राउ पर्नेमा पोखरा महानगरपालिका वडा नं १५ का २२ वर्षीय अर्जुन गुरुङ, २१ वर्षीय प्रितम गुरुङ, २० वर्षीय महेश गुरुङ र चितवनका अरबिन परियार छन् ।
घटनाको जानकारी पश्चात् वडा प्रहरी कार्यालय बैदामबाट खटिएको प्रहरी टोलीले अनुसन्धान तथा खोजतलास गर्दै जाँदा यही चैत १३ गते उनीहरुलाई पक्राउ गरेको जिल्ला प्रहरी कार्यालय कास्कीका निमित्त सूचना अधिकारी प्रहरी निरीक्षक अविनाश दीप जिसीले जानकारी दिए ।
जिसीका अनुसार पक्राउ परेका चारै जनालाई ज्यान मार्ने उद्योग मुद्दामा कास्की जिल्ला अदालतबाट दिन पाँच दिनको म्याद थप गरी अनुसन्धान प्रक्रिया अघि बढाइएको छ ।
