पोखरा । पोखरा महानगरपालिका वडा नं १६ बाटुलेचौरस्थित मातृशिशु मितेरी अस्पतालको क्षमता विस्तार गरिने भएको छ ।
गण्डकी प्रदेश सरकारको मन्त्रिस्तरीय बैठकले मातहतका सबै अस्पतालको सेवा विस्तार र स्तरोन्नति गर्ने निर्णय गरेसँगै मातृशिशु मितेरी अस्पतालको पनि क्षमता बढ्ने भएको हो ।
हाल अस्पतालको क्षमता २५ शय्याको छ । मन्त्रिस्तरीय निर्णयसँगै अस्पतालको क्षमता दोब्बर अर्थात ५० शय्याको हुनेछ ।
अस्पताल स्तरोन्नतिबारे मन्त्रिस्तरीय निर्णय गरी आर्थिक मामिला र मुख्यमन्त्री तथा मन्त्रिपरिषद् कार्यालयमा निर्णायार्थ पठाइएको छ ।
नागरिकलाई सर्वसुलभ र गुणस्तरीय सेवा प्रवाहका लागि अस्पतालको स्तरोन्नति आवश्यक देखिएपछि सोहीअनुसार काम गर्न लागिएको हो । अब स्तरोन्नतिको काम अघि बढ्ने स्वास्थ्य मन्त्रालयले जनाएको छ ।
तत्कालीन पोखरा उपमहानगरपालिका र जापानको कोमागाने नगरबीच भगिनी सम्बन्ध कायम भएको १०औँ वर्ष गाँठको अवसरमा २०६९ सालमा अस्पताल स्थापना गरिएको थियो ।
अस्पताललाई नेपाल सरकारले २०७३ असोज २२ माजिल्लास्तरको २५ शय्याको सरकारी अस्पतालमा स्तरोन्नति गरेको थियो । साविकको बाटुलेचौर स्वास्थ्य चौकी र मितेरी अस्पताललाई समायोजन गरी स्वास्थ मन्त्रालयअन्तर्गत सञ्चालन गरिएको थियो ।
पोखरा उपमहानगरपालिका संरक्षक र कोमागाने नगर सह-संरक्षकत्वमा स्थानीय जनताको सहयोगमा स्थापित अस्पतालले २०६७ साल कार्तिक २३ बाट पोलिक्लिनिकको रुपमा सेवा सुरु गरेको थियो ।
जनस्तरबाट महायज्ञमार्फत शुरुआत गरिएको अस्पतालमा २०६९ साल माघ २२ गतेदेखि महिला र बालबालिकाको क्षेत्रमा विशेषज्ञ सेवा प्रदान गर्दै आएको छ ।
यसैवर्ष पोखरा २६ स्थित गण्डकी आयुर्वेद अस्पताल र बागलुङको धौलागिरि आयुर्वेद अस्पताललाई अन्तरङ्ग सेवासहित २५ शय्याको सुविधायुक्त आयुर्वेद अस्पतालका रूपमा स्तरवृद्धि गरिएको थियो ।
अन्य कुन-कुन अस्पतालको हुँदैछ क्षमता विस्तार ?
प्रदेशको मन्त्रिस्तरीय बैठकले मुस्ताङ र मनाङलाई १५ बाट २५ शय्यामा स्तरोन्नति गर्ने निर्णय गरेको स्वास्थ्यमन्त्री कृष्णप्रसाद पाठकले जानकारी दिए । पर्वत, स्याङ्जा र तनहुँको दमौली अस्पताललाई १५ बाट ५० शय्यामा स्तरोन्नति गरिनेछ ।
यसैगरी बागलुङस्थित धौलागिरि प्रादेशिक अस्पताललाई ५० बाट बढाएर एक सय शय्या र नवलपुरको मध्यविन्दु प्रादेशिक अस्पताललाई १५ बाट एक सय शय्यामा स्तरवृद्धि गरिनेछ ।
आगामी आर्थिक वर्षदेखि धवलागिरि र मध्यविन्दु प्रादेशिक अस्पतालमा प्राविधिक शिक्षा पढाउने गरी पूर्वाधार तयारीका लागि काममा जुटेको मन्त्री पाठकले बताए ।
एक सय शय्याको अस्पतालले मात्र प्राविधिक विषय पढाउन पाउने व्यवस्था रहेकाले सोही अनुसार अस्पतालको स्तरोन्नति गर्न लागिएको छ ।
प्रदेश अस्पताल गोरखा, लमजुङ र म्याग्दी यसअघि नै ५० श्ययामा सञ्चालित छन् । प्रदेश सरकारले चालु आवमा गोरखाको आँपपीपल र बागलुङको बुर्तिबाङ अस्पताललाई आफू मातहत लिई सञ्चालन गरिरहेको छ ।
स्थानीय तहअन्तर्गत दुवै अस्पताललाई ५० शय्यामा स्तरवृद्धि गरी नयाँ व्यवस्थापनका साथ सञ्चालन गरिएको छ ।
यसअघि ढोरपाटन नगरपालिकामा रहेको बुर्तिबाङ अस्पताल प्राथमिक स्वास्थ्य केन्द्रका रूपमा सञ्चालित थियो । आँपपीपल अस्पताल गोरखाको पालुङटार नगरपालिकाअन्तर्गत रहँदै आएको थियो ।
स्थानीय तहले बुर्तिबाङ र आँपपीपल अस्पताललाई प्रदेश सरकारले जिम्मा लिन आग्रह गरेपछि प्रदेश सरकारले आफू मातहत ल्याई सञ्चालन गरेको छ । प्रदेश मन्त्रिपरिषद्को प्रस्तावलाई सङ्घीय मन्त्रिपरिषद्ले स्वीकृत गरेपछि यी दुई अस्पताल प्रदेश सरकारअन्तर्गत आएका हुन् ।
अस्पतालमा मानव संशाधन, पूर्वाधार र उपकरणको प्रबन्ध व्यवस्थित रूपमा हुने मन्त्री पाठकले बताए । अहिले स्वीकृत शय्याको सङ्ख्या तीन सय ९५ रहेकामा स्तरोन्नति हुँदा सात सय पुग्नेछ ।
अस्पतालले अहिले नै आठसय बढी श्यया सञ्चालन गरिरहेकामा नयाँ प्रस्तावअनुसार स्तरोन्नति हुँदा २१ श्य्या सञ्चालनमा ल्याउन सकिन्छ ।
हाल अस्पतालको वार्षिक आम्दानी ६६ करोड रुपैयाँ रहेकामा स्तरोन्नतिसहित अस्पताललाई व्यवस्थित गर्न सकिएमा तीन गुणाले आम्दानी बढ्ने मन्त्रालयको अनुमान छ ।
मन्त्रालयका अनुसार अस्पतालमा पाँच सय ६४ जनाको स्थायी दरबन्दी रहेकामा एक सय ८७ को पदपूर्ति हुन बाँकी छ ।
आठ सय बढी करार जनशक्तिसहित हाल ११ सय ३३ जना प्रदेश मातहतका अस्पतालमा कार्यरत रहेका मन्त्रालय जनाएको छ । अस्पताल स्तरोन्नति हुँदा पदपूर्ति हुन बाँकीसहित कूल एक हजार दुई सय ४४ को दरबन्दी व्यवस्थापन गर्नुपर्ने हुन्छ ।
अहिले कार्यरत अस्थायी र करार जनशक्तिको उचित व्यवस्थापन गरेर अस्पतालमा गुणस्तरीय सेवा दिन सकिने भन्दै मन्त्री पाठकले स्तरोन्नति गर्दा प्रदेश सरकारलाई धेरै ठूलो व्ययभार नपर्ने उनको भनाइ छ ।
