पोखरा । मदन भण्डारी स्पोर्टस् एकेडेमी गण्डकी प्रदेशद्वारा आयोजित निःशुल्क आँखा शिविरमा तीन सय ४७ जनाको निःशुल्क आँखा परीक्षण गरिएको छ ।
३२औं मदन-आश्रित स्मृति दिवसको अवसरमा हिमालय आँखा हस्पिटलको प्राविधिक सहयोगमा पोखरा रंगशालामा आयोजित शिविरमा खेलाडी, खेल संस्थाका प्रतिनिधि, पत्रकार गरी तीन सय ४७ जनाले आँखा परीक्षण गराएको एकेडेमीका अध्यक्ष गिरमान गुरुङले जानकारी दिए ।
गुरुङका अनुसार शिविरमा एक सय ९१ जनालाई औषधि वितरण, ३९ जनालाई चश्मा वितरण, मोतियाविन्दुको समस्या देखिएको सात जना र अन्य ३९ जना र आँखामा मासु पलाएका ११ जनालाई हिमालय आँखा हस्पिटल घारीपाटन रिफर गरिएको छ ।
शिविरमा सहभागीको दृष्टि विशेषज्ञ अनिश अधिकारी, रोश्ना भुजेल, झरना बुढा र ऋत्तिका किजुलगायतले सहजीकरण गरेका थिए ।
शिविरे उद्घाटन गर्दै पोखरा महानगरका उपप्रमुख मञ्जुदेवी गुरुङले मदन भण्डारी स्पोर्टस् एकेडेमीले खेलकुदको गतिविधिसंगै सामाजिक उत्तरदायित्व वहन गर्ने गरी आँखा शिविरको आयोजना गरेकोमा आभार प्रकट गरिन् ।
कार्यक्रमको सञ्चालन एकेडेमीका सचिव दिपक आचार्यले गरेका थिए भने कार्यक्रममा उपाध्यक्ष सुजन आचार्यले स्वागत मन्तब्य राखेका थिए ।
