पोखरा । पोखरा उद्योग वाणिज्य संघले यातायात व्यवसायीका मागलाई यथाशीघ्र पूरा गरी सार्वजनिक यातायात सञ्चालन गर्न आग्रह गरेको छ । संघका उपमहासचिव सुदीप प्रधानांगले एक विज्ञप्ति जारी गर्दै यस्तो आग्रह गरेका हुन् ।
एक दिनको बन्द र हड्तालले अर्थतन्त्रमा पाँच खर्ब रुपैयाँ भन्दा बढीको क्षति हुने गरेको आँकडालाई कसैले पनि नजरअन्दाज गर्न नमिल्ने संघले स्पष्ट पारेको छ ।
विज्ञप्तिमा भनिएको छ, ‘हामी हरेक प्रकारका बन्द र हड्तालका कार्यक्रमको सख्त बर्खिलापमा छौँ, एक दिनको बन्द र हड्तालले अर्थतन्त्रमा पाँच खर्ब रुपैयाँ भन्दा बढीको क्षति हुने गरेको आँकडालाई कसैले पनि नजरअन्दाज गर्न मिल्दैन भन्ने हाम्रो मान्यता रहेको छ ।’
आफ्नो पेशा÷व्यवसायको सुरक्षाको माग नाजायज नभएको भन्दै बन्द र हड्ताललाई त्यस्ता माग पूरा गराउने साधन बनाइन नहुने संघले स्पष्ट पारेको छ ।
साथै सूचना–प्रविधिको विकास र यसले खोलेका सम्भावनाका नयाँ आयामलाई रोक्न नसकिने र नमिल्ने भन्दै राइड सेयरिङ सूचना-प्रविधिले दिएको अर्को अवसर र सुविधा हो भन्ने संघको ठम्याइ रहेको संघले स्पष्ट पारेको छ ।
संघले विज्ञप्तिमा भनेको छ, ‘रोजगारी सिर्जना, राजश्व वृद्धि र युवा पलायन रोक्न पनि उत्तिकै योगदान दिन्छ भन्नेमा हामी प्रष्ट छौँ, यसर्थ, पोखरा उद्योग वाणिज्य संघ गण्डकी प्रदेश सरकारले ल्याएको ‘राइड सेयरिङ सम्बन्धी नियमावली २०८२’ लाई हार्दिक स्वागत गर्दछ, नियमावलीले संचालनमा रहेका राइड सेयरिङलाई व्यवस्थित र सुरक्षित बनाउने हाम्रो अपेक्षा रहेको छ ।’
यस्तो छ प्रेस विज्ञप्ति
