पोखरा । पोखरामा जारी श्रीगण्डकी शतकुण्डीय गायत्री कोटीहोम विराट ज्ञान महायज्ञमा शनिबार पोखरा महानगरपालिका वडा नं. ३३ का नीलकण्ठ पौडेलले तीन रोपनी बढी जग्गा दान गर्ने घोषणा गरे ।
उनले कोटीहोमका सङ्कल्पकर्ता बालयोगेश्वर श्रीविजय कृष्णमूर्तिजी महाराज सामू तीन रोपनी दुई दाम तीन पैसा जग्गा दान गर्ने घोषणा गरेका हुन् ।
यस्तै, नुवाकोटको वेलगाडी नगरपालिका वडा नं. २ का रामशरण न्यौपानेले चार आना जग्गा दान गर्ने घोषणा गरे ।
शुक्रबार स्याङ्जा भिरकोट नगरपालिका वडा नं २ का शेरजङ अधिकारी तथा लक्ष्मी केसी अधिकारीले १२ लाख रुपैयाँ बराबरको तीन रोपनी जग्गा दान गर्ने घोषणा गरेका थिए ।
कोटीहोम आयोजक मानव सेवा फाउन्डेसनका व्यवस्थापक विष्णु थापाका अनुसार कास्कीको अन्नपूर्ण गाउँपालिका र स्याङ्जाबाट करिब २२ रोपनी जग्गा प्राप्त भइसकेको छ ।
आश्रम स्थापनाकै लागि पोखराबाट धेरै भक्तजन र धार्मिक सङ्घसंस्थाले जग्गा दान गर्ने सूचना दिएको उनले जानकारी दिए ।
शनिबार कोटीहोममा दान गर्ने भक्तजनको लर्को लाग्यो । मानव सेवा फाउन्डेसनद्वारा सञ्चालित आश्रमका बाल बालिकाको अभिभावक र आजीवन सदस्य बन्ने भक्तजनको सङ्ख्या निकै धेरै रहेको प्रचारप्रचार संयोजक लेखराज ढकालले जानकारी दिए ।
शनिबार कोटीहोममा भोजपुरका शान्तामान राई र अस्मिता राईले पाँच लाख एक हजार, पूर्वमन्त्री हरि पाण्डे र तुलसा पाण्डेले दुई लाख पाँच हजार, रंगीला पौडेल आचार्य, भुवानी शंकर पौडेल परिवारले एक लाख एक हजार दुई सय २५, वीरबहादुर गुरुङबाट एक लाख एक हजार एक सय ११ सहयोग प्राप्त भयो ।
यसैगरी हरिमाया बरालबाट एक लाख ५३ हजार एक सय, भोलानाथ रेग्मीबाट ६० हजार (चौरासी पूजा), खुमबहादुर पौडेल स्याङ्जा वालिङबाट ६० हजार (चौरासी पूजा), जेरनाथ ढकाल, कृष्णकुमारी ढकालबाट ५१ हजार एक सय ११, राष्ट्रिय प्रजातन्त्र पाटीका केन्द्रीय उपाध्यक्ष ई.हेमजंग गुरुङबाट ५१ हजार सहयोग प्राप्त भएको बताइन्छ । कोटीहोममा हालसम्म करिब सात करोड रुपैयाँ संकलन भएको बताइन्छ ।
