पोखरा । कृषि सञ्जाल पोखरा-३० को आयोजनामा लेखनाथमा रोपाईं महोत्सव हुने भएको छ । महोत्सव यही असार १५ गते धान दिवसको अवसरमा मैदीताल नजिकैको खेतमा हुनेछ ।
महोत्सवमा माछा समात्ने, हिले दौड, खेत रोप्ने प्रतियोगिताका साथै पुराना गीतका भाका प्रस्तुत गर्ने र गीत संगीतलगायतका कार्यक्रम हुनेछन् ।
सञ्जालका अध्यक्ष बाबुराम ढकालले महोत्सवमा साबिक लेखनाथ नगरपालिकाका सबै वडालाई सहभागी गराउने प्रयास भइहेको बताए ।
पोखरा–३० का वडाध्यक्ष दुर्गाप्रसाद सुवेदीले कृषि सञ्जालले गरेका हरेक क्रियाकलाप प्रशंसायोग्य रहेको बताए । उनले महोत्सव कृषकको हितमा रहेको हुँदा महोत्सवबाट भएको बचत रकम कृषकलाई नै खर्च गरिने बताए .
लेखनाथ उद्योग वाणिज्य सङ्घका वरिष्ठ उपाध्यक्ष राजेन्द्र ओझाले रोपाईं महोत्सव संस्कृतिको जगेर्ना मात्रै नभई नयाँ पुस्तालाई पुरानो संस्कार सिकाउने थलोसमेत बन्ने विश्वास व्यक्त गरे ।
लेखनाथ जेसिसका अध्यक्ष कृष्ण तिवारीले महोत्सवमा सहभागितासँगै प्रतियोगिता समेत आयोजना गरेर जेसिसले सहयोग गर्ने बताए ।
कार्यक्रममा सहभागी विभिन्न राजनीतिक दलका नेता, स्थानीय समाजसेवी, महिला समूह, युवा क्लबका प्रतिनिधिले आआफ्नो क्षेत्रबाट सहयोग गरेर महोत्सवलाई बृहत बनाउने प्रतिबद्धता जनाए ।
