नेपाली कम्युनिष्ट पार्टी (नेकपा)बाट कास्कीमा तीन वटै निर्वाचन क्षेत्रका उम्मेदवारले आफूहरूले जनताको उत्साहजनक साथ पाएको जनाएका छन् ।
आ–आफ्नो क्षेत्रमा भेटघाट, घरदैलोमा व्यस्त उनीहरूले यस्तो बताएका हुन् ।
कास्की क्षेत्र नम्बर १ का उम्मेदवार राजकाजी गुरुङ (करण)ले जनताको भरोसा नेपाली कम्युनिष्ट पार्टी र आफूहरूमा रहेको पाएको बताए । उनले जनताले घरदैलो र टोलमा उत्साहजनक रूपमा स्वागत गर्दै अपेक्षा प्रकट गरिरहेको जानकारी दिए ।
“जनतामा हाम्रो पार्टी र हामीप्रति भरोसा छ । यो भरोसालाई कायम राख्दै उहाँहरूको सुख–दुःखमा सहभागी हुन्छौं,” उनले भने ।
कास्की क्षेत्र नम्बर २ का उम्मेदवार किरण थापा (आमोद)ले कास्कीमा कसैको गढ भन्ने नरहेको बताए । पुराना गढहरू भत्किएको र जनताले संविधानको रक्षा र परिवर्तनको एजेन्डा बोकेको नेकपासँग धेरै अपेक्षा राखेको पाएको सुनाए । उनले भने, “कास्कीमा कसैको गढ भन्ने छैन, पुराना भनिएका गढहरू भत्किएका छन् । जनताले संविधानको रक्षा गर्ने र राष्ट्रको समृद्धिका लागि एजेन्डा भएको दल खोजेका छन् । त्यो भनेको नेकपा नै हो ।”
कास्की क्षेत्र नम्बर ३ मा नेकपाका उम्मेदवार गोपाल गिरीले जनताले आफूहरूका सेवा गर्ने उत्कृष्ट विचार भएको दल र उम्मेदवार खोजेको बताए । त्यसका लागि भरोसायोग्य पार्टीका रूपमा नेपाली कम्युनिष्ट पार्टी र पात्रका रूपमा त्यसका उम्मेदवारलाई विश्वास गरेको उल्लेख गरे । “जनताले उत्कृष्ट विचार भएको दल खोजेका छन्,” उनले भने ।
कास्की क्षेत्र नम्बर ३ मा मंगलबार प्रतिनिधिसभा सदस्य प्रत्यक्षतर्फका उम्मेदवार गोपाल गिरी र समानुपातिक उम्मेदवार कृष्ण नेपालीसहित अन्नपूर्ण गाउँपालिकाको वडा नम्बर ६ र ७ मा सम्पर्क कार्यालय स्थापनासँगै घरदैलो कार्यक्रम छ ।
कास्की क्षेत्र नम्बर २ मा उम्मेदवार किरण थापा (आमोद), समानुपातिक उम्मेदवार ज्ञान आचार्यसहितका नेता, कार्यकर्ता पोखरा महानगरको वडा नम्बर २१ मा घरदैलोमा छन् ।
यसैगरी कास्की क्षेत्र नम्बर १ मा नेकपाका प्रत्यक्षतर्फका उम्मेदवार राजकाजी गुरुङ (करण), समानुपातिक उम्मेदवारहरू दिलु पन्त र सोमति गुरुङसहित नेता, कार्यकर्ता मादीको वडा नम्बर ४ मा घरदैलोमा छन् ।
