गोरखा । गोरखामा ट्याक्टरबाट खसेर एक जनाको घटनास्थलमै ज्यान गएको छ । मृत्यु हुनेमा आरुघाट गाउँपालिका वडा नं ५ भलछोपेका १८ वर्षीय रामबहादुर राना छन् ।
आर्खेतबाट माछीखोला जाने क्रममा ना६त ९६३० नम्बरको ट्याक्टरबाट खस्न गई पछाडिको पाङ्ग्राले कुल्चिएर उनको मृत्यु भएको प्रहरी नायव उपरीक्षक (डीएसपी) इन्द्रप्रसाद सुवेदीले जानकारी दिए ।
प्रहरीका अनुसार शुक्रबार बिहान करिब २ बजेको आरुघाट माछीखोला सडकखण्डको खुर्सानी भन्ने स्थानमा रानाको शव भेटिएको थियो । अनुसन्धान गर्दै जाँदा उनी ट्याक्टरबाट खसेको पाइएको डीएसपी सुवेदीले बताए ।
रानाको शव पोष्टमार्टमका लागि आरुघाट आधारभूत अस्पतालमा राखिएको छ । ट्याक्टर र चालकलाई नियन्त्रणमा लिएर घटनाबारे थप अनुसन्धान भइरहेको प्रहरीले जनाएको छ ।
