पोखरा । नेपालगञ्जमा भ्यानको ठक्करबाट एक जना बालकको ज्यान गएकाे छ । मृत्यु हुनेमा छ वर्षीय बालक दृश्यसिंह बुढाथोकी छन् ।
नेपालगञ्ज उपमहानगरपालिका वडा नं १२ बेलासपुरमा सडकमा गुडिरहेको भे१च ३८९५ नम्बरको डेलिभरी भ्यान अनियन्त्रित भएर सञ्जय सिलवालको घरको आँगनभित्र छिर्दा साे घटना भएकाे जिल्ला प्रहरी कार्यालय बाँकेका प्रहरी निरीक्षक हिम विकले जानकारी दिए ।
सो घटनामा तीन जना घाइते भएका छन् । घाइते हुनेमा स्थानीय ४३ वर्षीय सिलवाल, छ वर्षीया सृष्टि गौतम र आठ वर्षीय सञ्जीव सिलवाल छन् । उनीहरू घरबाहिर आँगनमा बसिरहेका समयमा भ्यानले लागेकाे हाे ।
घाइते तीनै जनाको नेपालगञ्ज मेडिकल कलेज शिक्षण अस्पताल नेपालगञ्जमा उपचार भइरहेको प्रहरीले जनाएको छ ।
भ्यान र भ्यान चालक २३ वर्षीय सुरज थारू र भ्यानमा सवार अर्का एक जना ३८ वर्षीय लियाकत अलीलाई नियन्त्रणमा लिएर घटनाबारे अनुसन्धान भइरहेको प्रहरीले जनाएको छ ।
