पोखरा । होटल प्रतिनिधि समाज पोखराले विविध कार्यक्रमका साथ २५औँ स्थापना दिवस तथा रजत महोत्सव मनाउने भएको छ ।
यस अवसरमा यही फागुन २० गते मंगलबार मैत्रीपूर्ण सेभेन ए साइड फुटवल प्रतियोगिता आयोजना गरिएको छ । प्रतियोगितामा संस्थामा आवद्ध सदस्य सहभागी हुन पाउनेछन् ।
समाजका सदस्यलाई चार समूहमा विभाजन गरी फुटवल प्रतिस्पर्धा गराउन लागिएको अध्यक्ष माधव लम्सालले जानकारी दिए । प्रतियोगिताको सबै तयारी पूरा भएको संयोजक एवं कार्यसमिति सदस्य चिरन्जीवी श्रेष्ठ (विक्रम) ले जानकारी दिए ।
यसैगरी चैत २४ गते पोखराको हेमजास्थित मानव सेवा आश्रममा खाद्यान्न तथा न्यायो कपडा वितण गरिने कार्यक्रम संयोजक एवं समाजका वरिष्ठ उपाध्यक्ष जीवराज उपाध्यायले जानकारी दिए ।
यस्तै आगामी चैत्र ३ गते संस्थाका संस्थापक अध्यक्षको उपस्थितिमा विशेष समारोह आयोजना गरिएको संयोजक एवं समाजका प्रथम उपाध्यक्ष दिलबहादुर अधीकारी (निरज) ले जानकारी दिए । उक्त अवसरमा विभिन्न व्यक्तित्व र संस्थालाई सम्मान गरिने उनले बताए ।
कार्यक्रमको सबै तयारी तीव्ररुपमा अघि बढाइनुका साथै संयोजकलगायत पदाधिकारी र सदस्यले काम गरिरहेको प्रचार-प्रसार संयोजक एवं समाजका महासचिव शिव पौडेलले जानकारी दिए
होटल प्रतिनिधि समाज हवाई तथा स्थालमार्ग भएर पोखरा आएका पर्यटकलाई सुरक्षित तवरले गन्तव्य स्थलमा पुर्याउने काम गर्ने प्रतिनिधिहरुको साझा संस्था हो ।
विसं २०५७ सालमा स्थापित संस्थामा हाल एक सय ५० जना सदस्य छन् । समाजको कार्यालय पोखरा-७ पर्यटन बसपार्कमा रहेको छ ।
समाजले पर्यटन लक्षित विभिन्न गतिविधिका साथै सामाजिक र रचनात्मक काम गर्दै आएको छ ।
