पोखरा । पोखरा महानगरपालिका वडा नं १९ ले वडा भित्रका ४८ जना ज्येष्ठ नागरिकलाई सम्मान गरेको छ । सम्मानित हुनेमा १०७ वर्षीया बालुदेवी ढुंगाना र १०३ वर्षीया भीमादेवी बास्तोला पनि छन् ।
पोखरा महानगरपालिकाको स्थापना दिवसको अवसरमा वडा कार्यालयले एक कार्यक्रम आयोजना गरी ९१ वर्ष पार गरेका ज्येष्ठ नागरिकलाई सम्मानपत्र, रुद्राक्षको माला, मायाको चिनो, दोसल्लासहित सम्मान गरिएको हो ।
गण्डकी प्रदेशका सामाजिक विकास, युवा तथा खेलकुद मन्त्री विन्दुकुमार थापाले ज्येष्ठ नागरिकलाई सम्मान गरेका हुन् ।
कार्यक्रम स्थलमै सहभागी हुन सक्ने २७ जनालाई मंगलबार सम्मान गरिएको हो भने बाँकीलाई उनीहरुकै घरमा पुगेर सम्मान गरिने वडासदस्य विकास कुमार आचार्यले जानकारी दिए ।
कार्यक्रममा मन्त्री थापाले ज्येष्ठ नागरिकको सम्मान, स्याहार र संरक्षण गर्ने दायित्व हामी सबैको भएको बताए । यस किसिमका कार्यक्रमहरूले सामाजिक सद्भावलाई बलियो बनाउने उनको जिकिर छ ।
यस्तो प्रशंसनीय कामका लागि वडाध्यक्ष पुष्पेन्द्र पाण्डेसहित वडा कार्यालय परिवारलाई उनले धन्यवाद दिए ।
माओवादी केन्द्र पोखरा १९ का अध्यक्ष नेत्रनाथ अधिकारीले ज्येष्ठ नागरिकको सम्मानले महत्वपूर्ण अर्थ राख्ने बताए ।
पोखरा महानगरपालिका सामाजिक विकास महाशाखा प्रमुख निर्मला शर्माले ज्येष्ठ नागरिक समाजको ऐना भएको भन्दै उनीहरुको सेवा र सम्मान अति आवश्यक हुने बताइन् ।
वडाध्यक्ष एवं कार्यक्रमका अध्यक्ष पुष्पेन्द्र पाण्डेले वडा कार्यालय नागरिकको हरेक दुःखमा साथमा रहेको बताए । उनले ज्येष्ठ नागरिक सबैको अभिभावक भएकाले उनीहरुको सम्मानमा कुनै कमि हुन नदिने बताए ।
कार्यक्रममा वडासदस्य दुर्गादेवी बस्नेतले स्वागत र विकासकुमार आचार्यले सञ्चालन गरेका थिए ।
महानगरको स्थापना दिवसकै अवसरमा पोखरा-१९ ले पोखरा-२५ हेमजास्थित मानवसेवा आश्रमलाई कम्प्युटर र पोखरा-१९ कै दलित नागरिकलाई विद्युतीय आरन औजार प्रदान गरेको छ ।
तस्बिरहरु
