पोखरा । पोखरा महानगरपालिकाका प्रमुख धनराज आचार्यले पोखरा-२१ म भएको घटना निन्दनीय भएको बताएका छन् ।
स्थानीय भूपेन्द्र गिरीले सार्वजनिक जग्गा अतिक्रमण गरी संरचना बनाएको विवादमा वडाध्यक्ष दीपक सुवेदीमाथि रड प्रहार गर्नुका साथै नगर प्रहरी र अन्य जनप्रतिनिधिमाथि हातपात र आक्रमण गरेका थिए ।
घटनापछि नगर प्रमुख आचार्यले भनेका छन्, ‘पोखरा २१ मा सार्वजनिक जमिनमा अतिक्रमण गरी संरचना बनाएको खवर पश्चात सो संरचना हटाउन अनुरोध गर्दै कागजपत्र लिएर कार्यालय आउन अनुरोध गर्दा अटेर गरी उल्टै नगर प्रहरी, वडाध्यक्ष र अन्य जनप्रतिनिधिमाथि हातपात र आक्रमण हुनु निन्दनीय छ, यस गलत कामविरुद्ध कानुनी कारबाही सुनिश्चित भइरहेको छ । यस्ता घटनाले विकास र न्यायको मार्गमा ठूलो अवरोध सिर्जना गर्छन् ।’
सार्वजनिक सम्पत्तिको संरक्षण र विकासमा सहकार्य गर्न उनले आग्रह गरे । आचार्यले अपिलमा भनेका छन्, ‘पोखरा उपत्यका नगर विकास समितिले सरकारी जमिनको श्रेस्ता तयार पारेर महानगरभित्रका चौर, पाटन, पोखरी तथा सार्वजनिक जमिनलाई एकीकृत र संरक्षण गर्ने अभियान चलाइरहेको छ, यस कार्यलाई सफल बनाउन, सबै सरोकारवालाले आफ्नो योगदान पु¥याउनु हुन अनुरोध गर्दछौँ ।’
‘पोखरा-२१ मा गराइएकाे घटना निन्दनीय छ, यस गलत कामविरुद्ध कानुनी कारबाही सुनिश्चित भइरहेको छ, यस्ता घटनाले विकास र न्यायको मार्गमा ठूलो अवरोध सिर्जना गर्छ’, उनले भने ।
यता, पोखरा महानगरपालिका वडा नं २१ का वडाध्यक्ष दीपक सुवेदीले आफूमाथि रड प्रहार गरेको आरोपमा स्थानीय भूपेन्द्र गिरीविरुद्व वडा प्रहरी कार्यालय बैदाममा निवेदन दिएका छन् । निवेदनमा गिरीलाई पक्राउ गरी कानून अनुसार कडा कार्वाही गर्न माग गरिएको छ ।
