पोखरा । पोखरा महानगरपालिका वडा नं १२ स्थित पोखरा युनाइटेड एकेडेमीमा एसइई कप २०८२ सम्पन्न भएको छ । प्रतियोगिताअन्तर्गत बास्केटवल (छात्र) तर्फ बेनी नगरपालिका (बेनपा) ले जितेको छ । बेनपाले अन्नपूर्ण गाउँपालिका बीलाई पराजित गर्दै उपाधि जितेको हो ।
विजेता बेनपाले १२ हजार तथा उपविजेता अन्नपूर्ण गाउँपालिका बीले आठ हजार रुपैयाँ नगद पुरस्कार, ट्रफी मेडल र प्रमाणपत्र प्राप्त गरेका छन् ।
यस्तै बास्केटवल (छात्रा) तर्फको उपाधि अमिचीले जितेको छ । मर्दीखोलालाई पराजित गर्दै उपाधि जितेको अमिचीले १२ हजार रुपैयाँ नगद पुरस्कार, ट्रफी, मेडल र प्रमाणपत्र प्राप्त गरेको छ ।
उपविजेता मर्दीखोलाले आठ हजार रुपैयाँ नगद पुरस्कार, ट्रफी, मेडल र प्रमाणपत्र प्राप्त गरेको छ । बास्केटवलमा छात्रतर्फ ३४ र छात्रातर्फ नौ गरी ४३ टिमले प्रतिस्पर्धा गरेको विद्यालयका सहायक प्राचार्य गोविन्दप्रसाद चापागाईंले जानकारी दिए ।
यता, भलिबल (छात्र) तर्फको उपाधि न्यू ग्यालेक्सी माविले जितेको छ । न्यू ग्यालेक्सीले पोखरा युनाइटेडलाई पराजित गर्दै उपाधि रक्षा गरेको हो । विजेता न्यू ग्यालेक्सीले १२ हजार र उपविजेता पोखरा युनाइटेडले आठ हजार रुपैयाँ नगद पुरस्कार, ट्रफी, मेडल र प्रमाणपत्र प्राप्त गरेको छ ।
यस्तै भलिवल (छात्रा) तर्फ भकुण्डेको शान्ता माविले पोखरा युनाइटेडलाई हराउँदै उपाधि जितेको छ । विजेता शान्ताले १२ हजार र उपविजेता पोखरा युनाइटेडले आठ हजार रुपैयाँ नगद पुरस्कार, ट्रफी, मेडल र प्रमाणपत्र प्राप्त गरेको छ । भलिवलमा ४० छात्र र १० छात्रा गरी ५० टिमको सहभागिता रहेको थियो ।
यता, फुटसलको उपाधि वेलनन एकेडेमीले जितेको छ । वेलननले स्टेप बाई स्टेप बीलाई पराजित गर्दै उपाधि रक्षा गरेको हो । विजेता वेलननले १२ तथा उपविजेता स्टेप बाई स्टेप बीले आठ हजार रुपैयाँ नगद पुरस्कार, ट्रफी, मेडल र प्रमाणपत्र प्राप्त गरे । प्रतियोगितामा ३२ टिम सहभागी थिए ।
यस्तै तीन चरणमा भएको क्वीज प्रतियोगितामा पोखरा युनाइटेड एकेडेमी, गण्डकी बोर्डिङ स्कुल र शान्ति निकेतन स्कुल प्रथम भएका छन् । विजेता तीन वटै विद्यालयले चार÷चार हजार रुपैयाँ नगद पुरस्कार ट्रफी, मेडल र प्रमाणपत्र प्राप्त गरेका छन् । प्रतियोगितामा १२ टिमको सहभागिता रहेको थियो ।
विजेता टिम तथा खेलाडीलाई विद्यालय व्यवस्थापन समिति अध्यक्ष शिवबहादुर भण्डारी, प्राचार्य बयानबहादुर गोदार, सहायक प्राचार्यद्वय देवेन्द्र अधिकारी र गोविन्दप्रसाद चापागाईं, विद्यार्थी संयोजक फणीन्द्रराज पौडेललगायतले पुरस्कार वितरण गरेका थिए ।
२०५० सालमा स्थापित विद्यालयमा हाल नौ सय ५० विद्यार्थी रहेकामा कक्षा ११ र १२ मा मात्रै दुई सय ५० विद्यार्थी छन् । विद्यालयका कक्षा ११ र १२ मा विज्ञान, व्यवस्थापन र होटल व्यवस्थापनको पढाई हुँदै आइरहेको छ ।
विद्यालयका अनुसार आगामी दिनमा मोवाइल, टीभी र अन्तर्राष्ट्रिय भाषासँग सम्बन्धित कक्षा सञ्चालनको तयारी गरिएको छ ।
तस्बिरहरु
