जनता समाजवादी पार्टी नेपालले गौर हत्याकाण्डको विषयलाई लिएर मसाल जुलुस निकाल्दै निषेधित क्षेत्र प्रवेश गर्ने क्रममा प्रहरीले बुधबार बबरमहलबाट नेता कार्यकर्ता पक्राउ गरेको छ । जसपा नेपालका सङ्घीय सांसद एवं प्रवक्ता मनिष कुमार सुमन, मधेस प्रदेश सांसद किरन साह, लुम्बिनी प्रदेश सांसद अम्बिका काफ्लेसहित १८ जनालाई गिरफ्तार गरेको जनता पार्टीका प्रवक्ता मनिष सुमनले बताउनु भयो ।
गिरफ्तार गरिएकाहरुमा बबी सिंह, रेणुराज सिंह, केन्द्रीय सदस्य शशिकपुर मियाँ, समाजवादी विद्यार्थी युनियनका अध्यक्ष मनिष यादव, समाजवादी युवाका महासचिव दिलिप पटेल, युवा नेता मनिष यादव ओम, दिनेश यादव, समाजवादी विधार्थी युनियन नेपालका महासचिव बलराम कापरी, कार्यालय सचिव मुकेश यादव, हंसा साह, पुर्व प्रदेश सभा सदस्य बिन्देश्वर यादव विक्की, स्मिता यादव, विधार्थी युनियनको उपाध्यक्ष ललन यादव, भोगेन्द्र यादव रहेका छन्।
२०६३ साल चैत ७ गते रौतहटको गौरमा तत्कालीन मधेसी जनअधिकार फोरम र माओवादी–निकट मधेसी राष्ट्रिय मुक्ति मोर्चाबिच भएको झडपमा २७ जनाको मृत्यु भएको थियो ।
सोही घटनाका पीडितले प्रहरीले अनुसन्धान अघि नबढाएपछि सर्वोच्च अदालतमा रिट दायर गरेका थिए ।
सर्वोच्च अदालतका न्यायाधीश तिलप्रसाद श्रेष्ठ र नित्यानन्द पाण्डेको सोमबारको संयुक्त इजलासले गौर हत्या घटना छानविनका लागि निवेदकको माग बमोजिम परमादेश जारी गरेको हो ।
यो आदेशसँगै जसपा नेपालका अध्यक्ष उपेन्द्र यादव अनुसन्धानमा तानिने भएपछि कार्यकर्ताहरुले मसाल जुलुस निकालेका हुन् ।
