पोखरा ।
गण्डकी र कर्णाली प्रदेशमा गुणस्तरीय आँखा स्वास्थ्य सेवा विस्तार गर्ने उद्देश्यले नेपाल नेत्रज्योति संघ हिमालय आँखा अस्पतालले पोखरामा वार्षिक कार्ययोजना गोष्ठी आयोजना गरेको छ । शनिबार सम्पन्न गोष्ठीमा चालु आर्थिक वर्षका लागि आवश्यक रणनीति तथा कार्ययोजना तय गरिएको हो ।
गोष्ठीमा गण्डकी र कर्णाली प्रदेशका आँखा अस्पताल तथा आँखा उपचार केन्द्रका प्रतिनिधिहरुको सहभागिता रहेको थियो । कार्यक्रममा नेत्र विशेषज्ञ तथा सरोकारवालाहरुले दुर्गम क्षेत्रसम्म आँखा स्वास्थ्य सेवाको पहुँच विस्तार गर्ने विषयमा गहन छलफल गरेका थिए । साथै, उनीहरुले गत वर्ष सम्पन्न कार्यक्रम, उपलब्धि र प्रगतिको विस्तृत समीक्षा समेत गरेका थिए ।
समुदायसम्म गुणस्तरीय आँखा स्वास्थ्य सेवा विस्तार गर्ने उद्देश्यले रणनीतिक योजना तयार गरिएको छ । सेवा प्रवाहलाई अझ प्रभावकारी बनाउने विषयमा सहभागीहरूले आआफ्ना अनुभव आदानप्रदान गर्दै आगामी वर्षका लागि कार्यान्वयनयोग्य कार्ययोजना तर्जुमा गरेका छन् ।
कार्यक्रममा नेपाल नेत्रज्योति संघका महासचिव भरतबहादुर चन्दले आँखा स्वास्थ्य सेवालाई समुदायको घरदैलोसम्म सहज रूपमा पुर्याउन सबै पक्षको समन्वय आवश्यक रहेको बताए । त्यसैगरी, नेपाल नेत्रज्योति संघका केन्द्रीय उपाध्यक्ष तथा गण्डकी प्रदेश सभापति दिलबहादुर क्षेत्रीले पनि कार्यक्रमलाई सम्बोधन गर्दै गुणस्तरीय सेवा विस्तारका लागि साझा प्रयास आवश्यक रहेको उल्लेख गरे ।
कार्यकारी निर्देशक शैलेशकुमार मिश्रले आँखा स्वास्थ्य सेवा विस्तारका चुनौती तथा समाधानका सम्भावित उपायबारे आफ्नो धारणा राखे। गोष्ठीको अध्यक्षता वरिष्ठ अधिवक्ता सुरेन्द्र थापा मगरले गरेका थिए। कार्यक्रममा नेपाल नेत्रज्योति संघका विभिन्न निकायका प्रतिनिधि तथा सरोकारवालाहरूको सक्रिय सहभागिता रहेको थियो।
