फोटोग्राफी र फोटोपत्रकारिताका माध्यमबाट समाज र देशलाई चिनाउँदै आएका पोखराका फोटोपत्रकार प्रेम थापा ‘मिलन युथ एनर्जेटिक फोटोग्राफी अवार्ड’बाट सम्मानित भएका छन्। पोखरा फोटोग्राफर संघद्वारा आयोजित ४५औँ वार्षिक साधारण सभा, पाँचौँ पोखरा फोटोग्राफी अवार्ड वितरण, ‘फोकस’ तेस्रो स्मारिका विमोचन तथा २५औँ अधिवेशन समारोहको अवसरमा उनलाई सो सम्मान प्रदान गरिएको हो।
पुरस्कार प्राप्त गरेलगत्तै थापाले सामाजिक उत्तरदायित्वको उदाहरणीय दृष्टान्त पेस गरेका छन्। उनले अवार्डस्वरूप प्राप्त नगद पुरस्कारमा आफ्नै तर्फबाट सोही बराबरको रकम थपेर बाढीपीडित परिवारको सहयोगका लागि प्रदान गरेका छन्। सानो सहयोगले पनि कसैको दुःखमा थोरै भए पनि राहत मिलोस् भन्ने उद्देश्यले यो निर्णय लिएको थापाले बताएका छन्।
राष्ट्रिय फोटोपत्रकार समूह कास्कीका सचिव, चलचित्र पत्रकार संघ कास्कीका कार्यसमिति सदस्य तथा ‘इभेन्ट पोखरा’का सञ्चालक समेत रहेका थापा लामो समयदेखि फोटोग्राफी क्षेत्रमा सक्रिय छन्। यसअघि बंगलादेशमा सम्पन्न अन्तर्राष्ट्रिय फोटोपत्रकारिता अवार्डबाट समेत सम्मानित भइसकेका उनले राष्ट्रिय तथा अन्तर्राष्ट्रिय स्तरमा नेपालको पहिचान र गौरव बढाउन निरन्तर योगदान पुर्याउँदै आएका छन्। अवार्डसँगै सामाजिक सेवाको भावनालाई जोडेर थापाले गरेको यो पहलले फोटोग्राफी र पत्रकारिता क्षेत्रबाट पनि समाजप्रति उत्तरदायी बन्न सकिन्छ भन्ने सकारात्मक सन्देश प्रवाह गरेको छ।
