जनसेवी बचत तथा ऋण सहकारीको सातौँ स्थापना दिवस तथा वार्षिक साधारण सभा सम्पन्न

पोखरा । जनसेवी बचत तथा ऋण सहकारी संस्था लिमिटेड, पोखरा–८, कास्कीको सातौँ स्थापना दिवस तथा वार्षिक साधारण सभा–२०८३ सम्पन्न भएको छ। होटल पौवामा आयोजित कार्यक्रममा संस्थाको प्रगति, वित्तीय अवस्था तथा आगामी योजनाका विषयमा छलफल गरिएको थियो।
कार्यक्रमको अध्यक्षता संस्थाका अध्यक्ष तीर्थ शर्मा ढकालले गर्नुभएको थियो। कार्यक्रममा समाजसेवी, साहित्यकार तथा पूर्वमन्त्री त्रिलोचन ढकाल प्रमुख अतिथिका रूपमा सहभागी हुनुहुन्थ्यो।
त्यसैगरी गणपति लघुवित्तका प्रमुख कार्यकारी अधिकृत विष्णु ढकाल र NMB लघुवित्तका कार्यकारी प्रमुख सजल खड्का विशेष अतिथिका रूपमा सहभागी हुनुहुन्थ्यो। संस्थाका संस्थापक अध्यक्ष केशव ढकाल वचन पनि विशेष अतिथिका रूपमा उपस्थित हुनुहुन्थ्यो।
कार्यक्रममा सामाजिक विकास मन्त्रालयका उपसचिव टंक ढकाल, यातायात कार्यालय कास्कीका प्रमुख नारायणप्रसाद ढकाल, दिवस ढकाल, बाबुराम ढकाल, ऋषिराम ढकाल, दीपेन्द्रराज ढकाल, कृतिनाथ देवकोटा, रामप्रसाद भण्डारी तथा खेमनारायण रेग्मी लगायतका अतिथिहरूको उपस्थिति रहेको थियो। कार्यक्रमको सञ्चालन संस्थाका संस्थापक सचिव धर्मदत्त आचार्यले गर्नुभएको थियो भने स्वागत विष्णु ढकाल पौडेल ले गर्नुभएको थियो।
सभामा प्रस्तुत २०८३ भदौ ३१ गतेसम्मको वित्तीय विवरणअनुसार संस्थाको शेयर पुँजी रु. २ करोड ४१ लाख १३ हजार ३०० रहेको छ भने विभिन्न कोषमा रु. ६ लाख २९ हजार ७२१.६१ रहेको छ। संस्थाको कुल बचत रकम रु. ४ करोड २० लाख ९७ हजार ४६१.३७ रहेको विवरण प्रस्तुत गरिएको छ।
त्यस्तै, संस्थाले लगानीमा रहेको कर्जा रकम रु. ७ करोड १ लाख ४५ हजार १५६ रहेको जनाएको छ। संस्थाको तरलता रकम रु. २० लाख ९ हजार ६५३.५९ रहेको छ भने तरलता अनुपात ५ प्रतिशत रहेको छ।
संस्थामा हाल ५१४ जना शेयर सदस्य र २१२ जना ऋणी सदस्य रहेको विवरणमा उल्लेख छ। भदौ मसान्तसम्म संस्थाले रु. २ लाख ३४ हजार २६४.३० नाफा आर्जन गरेको जनाएको छ। त्यस्तै, संस्थाको सञ्चालन स्वसक्षमता ९५ प्रतिशत रहेको तथा कुल सम्पत्ति करिब रु. ७ करोड ५१ लाख रहेको विवरण सभामा प्रस्तुत गरिएको थियो।
सभामा संस्थाले हालसम्म हासिल गरेको प्रगति, वित्तीय अवस्था, सदस्यहरूलाई प्रदान गर्दै आएको सेवा तथा आगामी दिनमा संस्थालाई थप व्यवस्थित र सुदृढ बनाउने विषयमा छलफल गरिएको थियो।
“आर्थिक समृद्धिको लागि जनसेवा” भन्ने मूल नाराका साथ स्थापना भएको जनसेवी बचत तथा ऋण सहकारी संस्था लिमिटेडले सदस्यहरूको आर्थिक तथा सामाजिक हितलाई केन्द्रमा राख्दै आफ्ना गतिविधि सञ्चालन गर्दै आएको जनाएको छ।