पोखरा। पोखरा महानगरपालिका-१० रामबजारस्थित ज्योतिकुञ्ज सेकेण्डरी अंग्रेजी माध्यमिक विद्यालयले विजयादशमी, दीपावली, छठ र ईदलगायत पर्वको अवसरमा शुभकामना आदानप्रदान कार्यक्रम सम्पन्न गरेको छ।
विद्यालयले प्रिप्राइमरीदेखि कक्षा ३ सम्मका विद्यार्थीलाई सहभागी गराएर कार्यक्रम आयोजना गरेको हो। कार्यक्रममा विद्यालयका संस्थापक तथा निर्देशक बालकृष्ण शर्मा, इन्चार्ज सपना गुरुङ र शिक्षक–शिक्षिकाले विद्यार्थीलाई टीका र जमरा लगाइदिँदै पर्वको शुभकामना दिएका थिए।
कार्यक्रममा विद्यालयका संस्थापक तथा निर्देशक बालकृष्ण शर्माले दशैँ नेपाली समाजको महत्वपूर्ण सांस्कृतिक पर्व भएको उल्लेख गर्दै यसले परिवार र समुदायबीच आपसी सद्भाव, प्रेम र एकताको भावना बलियो बनाउने बताए।
बालबालिकालाई सानैदेखि चाडपर्वको सांस्कृतिक महत्व, पारिवारिक आत्मीयता र सामाजिक सद्भावबारे बुझाउन यस्ता कार्यक्रम उपयोगी हुने उनको भनाइ थियो।
विद्यालयकी इन्चार्ज सपना गुरुङले चाडपर्वले बालबालिकामा खुसी बाँड्ने, आपसी सम्मान गर्ने र आफ्नो संस्कृतिप्रति परिचित हुने अवसर प्रदान गर्ने बताइन्। विभिन्न धर्म र समुदायका पर्वलाई सम्मान गर्दै सबै मिलेर खुसी साटासाट गर्ने संस्कार विकास गर्नुपर्नेमा उनले जोड दिइन्।
विद्यालयले हरेक वर्ष विभिन्न पर्वका अवसरमा विद्यार्थीमाझ यस्ता कार्यक्रम गर्दै आएको जनाएको छ। यस्ता गतिविधिले विद्यार्थीलाई पुस्तकको ज्ञानसँगै नेपाली संस्कृति, परम्परा र सामाजिक सद्भावको महत्व बुझ्न सहयोग पुग्ने विद्यालयको विश्वास छ।
कार्यक्रममा शिक्षकहरू कुसुम गुरुङ, कञ्चन राई, मञ्जरी मगर, शारदा आले, आरती गुरुङ, उषा गुरुङ, एलिशा थापा, मीना कुमारी द्वा र प्रिया थापाको सहभागिता थियो।
२०४६ सालमा स्थापना भएको विद्यालयमा कक्षा १० सम्म पठनपाठन हुँदै आएको छ। कक्षा ११ र १२ मा व्यवस्थापन तथा कम्प्यूटर विज्ञान संकाय सञ्चालनमा रहेका छन्। विद्यालयमा हाल करिब सात सय विद्यार्थी अध्ययनरत छन्।
