पोखरा । २००७ सालको राणाविरोधी क्रान्तिमा पश्चिमाञ्चल क्षेत्रको कमाण्डरका रूपमा काम गरेका प्रजातन्त्र सेनानी स्व. चित्रबहादुर गुरुङको अर्धकदको सालिक पोखरा महानगरपालिका-१७, मुस्ताङ चोकबाट वडा नम्बर १८ स्थित राष्ट्रिय सहिद तथा विभूति पार्क मेथ्लाङमा स्थानान्तरण गरिएको छ।
गुरुङको ३७औँ स्मृति दिवसका अवसरमा सोमबार आयोजित कार्यक्रममा पोखरा महानगरपालिकाका प्रमुख धनराज आचार्य र उपप्रमुख मञ्जुदेवी गुरुङले सालिक अनावरण गरे।
स्व. चित्रबहादुर गुरुङ स्मृति प्रतिष्ठान पोखरा-१७ को आयोजनामा भएको कार्यक्रममा जनप्रतिनिधि, राजनीतिक दलका प्रतिनिधि, परिवारजन तथा समाजसेवी सहभागी थिए।
कार्यक्रममा नगरप्रमुख आचार्यले राणाशासनविरुद्धको आन्दोलनमा योगदान दिएका गुरुङ पछि कम्युनिस्ट आन्दोलनमा सक्रिय भएको स्मरण गरे।
पुष्पलाल क्षेत्रीसँगको सान्निध्यमा नेपाली कम्युनिस्ट आन्दोलनसँग जोडिएका गुरुङको योगदानलाई सम्मान गर्दै तत्कालीन प्रधानमन्त्री मनमोहन अधिकारीबाट मुस्ताङ चोकमा सालिक अनावरण गरिएको उनले बताए।
आचार्यका अनुसार मुख्य चोकहरूमा रहेका सालिकलाई व्यवस्थित रूपमा संरक्षण गर्दै ऐतिहासिक तथा राजनीतिक व्यक्तित्वहरूको योगदानबारे नयाँ पुस्तालाई जानकारी गराउने उद्देश्यले सहिद तथा विभूति पार्कमा स्थानान्तरण गर्ने काम अघि बढाइएको हो। मुस्ताङ चोकमा रहेको सालिकलाई पनि यही उद्देश्यअनुसार पार्कमा ल्याइएको उनले स्पष्ट पारे।
उनले पार्कलाई विभिन्न राष्ट्रिय व्यक्तित्व तथा सहिदहरूको योगदान अध्ययन गर्न सकिने स्थलका रूपमा विकास गरिने जानकारी दिए।
पार्कमा रहेका प्रत्येक सालिकसँग सम्बन्धित व्यक्तिको परिचय, योगदान र ऐतिहासिक पृष्ठभूमिबारे जानकारी दिने क्युआर कोडसहितका सूचना प्लेट राख्ने योजना रहेको उनले बताए। यसबाट पार्क घुम्न आउनेले सम्बन्धित व्यक्तित्वबारे सहजै पढ्न र बुझ्न सक्ने उनको भनाइ थियो।
पार्कमा थप ऐतिहासिक व्यक्तित्वका सालिक राख्न आवश्यक पूर्वाधार तयार भइरहेको उल्लेख गर्दै आचार्यले राष्ट्रिय योगदानका आधारमा अन्य व्यक्तित्वका प्रतिमा राख्ने विषयमा पनि छलफल भइरहेको बताए। पार्कलाई पोखराको आकर्षणको केन्द्रका रूपमा विकास गर्न सबैलाई भ्रमण गर्न उनले आग्रह गरे।
कार्यक्रममा नेकपा एमाले कास्की जिल्ला कमिटीका उपाध्यक्ष भेषराज बरालले मन्तव्य राखेका थिए।
गुरुङ भाइखलकका ज्येष्ठ सदस्य भोजप्रसाद गुरुङको अध्यक्षतामा भएको कार्यक्रममा गुरुङकी नातिनीबुहारी तथा पोखरा-१७ की पूर्व वडासदस्य शान्तादेवी गुरुङले स्वागत र वडा सदस्य विक्रम गुरुङले सञ्चालन गरेका थिए।
कार्यक्रममा नेकपा एमाले पोखरा महानगर कमिटीका अध्यक्ष जीवनप्रसाद आचार्यसहित विभिन्न राजनीतिक दलका प्रतिनिधि तथा परिवारजनको उपस्थिति थियो।
स्व. गुरुङको सालिक वरिष्ठ प्रजातन्त्रवादी नेता गणेशमान सिंहको निर्देशनअनुसार सेनानी हस्तबहादुर गुरुङले २०५२ असोज २६ गते शिलान्यास गरेका थिए।
तत्कालीन प्रधानमन्त्री मनमोहन अधिकारीले २०५३ मंसिर २१ गते मुस्ताङ चोकमा सालिक अनावरण गरेका थिए। गुरुङको जन्म पर्वतको तत्कालीन भोक्सिङ, खोलाखर्कमा वि.सं. १९७५ मा भएको र उनको निधन वि.सं. २०४७ मा भएको स्मृति विवरणमा उल्लेख छ।
