पोखरा । होटल प्रतिनिधि समाज पोखराको अध्यक्षमा माधव लम्साल पुनः सर्वसम्मत निर्वाचित भएका छन्। समाजको २७औँ साधारणसभा तथा १५औँ अधिवेशनले लम्सालको नेतृत्वमा नयाँ कार्यसमिति चयन गरेको हो।
नवनिर्वाचित कार्यसमितिको वरिष्ठ उपाध्यक्षमा जीवराज उपाध्याय, उपाध्यक्षमा वामन चौधरी र निरज अधिकारी, महासचिवमा शिव पौडेल, कोषाध्यक्षमा डिकबहादुर डाँगी, सहसचिवमा चिरञ्जीवी श्रेष्ठ र सहकोषाध्यक्षमा अर्जुन खत्री चयन भएका छन्।
त्यस्तै, कार्यसमिति सदस्यमा भूपाल थापा, प्रविन विक, मधुसुधन गौतम र शिवहरि अर्याल निर्वाचित भएका छन्।
यसअघि अधिवेशनको उद्घाटन गर्दै नेपाल पर्यटन बोर्डका सदस्य सन्तोष पोखरेलले पोखराको पर्यटन प्रवर्द्धनमा होटल क्षेत्रको भूमिका महत्त्वपूर्ण रहेको उल्लेख गर्दै पर्यटन व्यवसायीबीच सहकार्य र समन्वय आवश्यक रहेको बताए।
समाजका पूर्वअध्यक्ष तथा होटल संघ पोखराका अध्यक्ष लक्ष्मण सुवेदीले होटल व्यवसायको विकास र पर्यटन क्षेत्रको गुणस्तर अभिवृद्धिका लागि व्यवसायीबीच एकता र सहकार्यमा जोड दिए।
पोखरा पर्यटन परिषद्का वरिष्ठ उपाध्यक्ष हरिराम अधिकारी र सामुदायिक सेवा केन्द्र जिल्ला समन्वय समिति कास्कीका अध्यक्ष भीमप्रसाद पराजुलीले पनि पर्यटन प्रवर्द्धन तथा सामाजिक उत्तरदायित्वका विषयमा धारणा राखेका थिए।
समाजका पूर्वअध्यक्ष तिलकबहादुर क्षेत्रीले संस्थाको विकास र व्यावसायिक हकहितका लागि निरन्तर सक्रिय रहनुपर्ने बताए।
अध्यक्ष माधव लम्सालले होटल प्रतिनिधि समाजलाई थप व्यवस्थित र सक्रिय बनाउँदै होटल व्यवसायीको हकहित संरक्षण तथा पर्यटन प्रवर्द्धनका क्षेत्रमा काम गर्ने प्रतिबद्धता जनाए। उनले सदस्यबीच आपसी एकता र सहकार्य बढाउँदै व्यवसायीले भोग्दै आएका समस्या समाधानका लागि सम्बन्धित निकायसँग समन्वय गर्ने बताए।
अध्यक्ष लम्सालको अध्यक्षतामा भएको कार्यक्रममा महासचिव शिव पौडेलले प्रस्तुत गरेको कार्यप्रगति प्रतिवेदन र कोषाध्यक्ष डिकबहादुर डाँगीले प्रस्तुत गरेको आयव्यय प्रतिवेदन साधारणसभाले पारित गरेको छ।
कार्यक्रममा वरिष्ठ उपाध्यक्ष जीवराज उपाध्यायले स्वागत र सञ्चालन महासचिव शिव पौडेलले गरेका थिए।
