पोखरा । पोखरा महानगरपालिका वडा नं १७ ढुंगेसाँघुमा ऐतिहासिक ढुंगेसाँघु मेला सम्पन्न भएको छ । माघेसंक्रान्तिको दिनमा यहाँ हरेक वर्ष ढुंगेसाँघु मेला लाग्ने गर्दछ ।
पोखरा-१५ र १७ लाई जोड्ने ढुंगाको पुल रहेकोले त्यसलाई ढुंगेसाँघु भन्ने गरिएको बताइन्छ ।
माघेसंक्रान्तिका दिनभर सेती नदीमा स्नान गर्ने, सदाशिवजी सिद्देश्वर हरिहर मन्दिरमा पूजा गरिएको थियो । साथै मेलामा कुटो, कोदालो, मान्द्रो, हसिँया नाङ्लो, भाँडाकुँडा, लत्ताकपडा किन्नेको भीड लागेको थियो ।
यो मेला अन्य भन्दा फरक छ । यहाँ प्रचारप्रसार बिनै हजारौँ सहभागी हुने गर्दछन् । भगवान राम र सीताले माघेसंक्रान्तिको दिनमा यस क्षेत्रमा बसेर खाजा खाएको धार्मिक विश्वास छ ।
त्यसैले सखर, चिउरा, तरुल खानेगरी मेलाको आयोजना गर्न थालिएको किंवदन्ती छ । मेलाको आकर्षणमा घरायसी सामानको बिक्री, मन्दिरको दर्शन र खेलकुद प्रतियोगिता हुने गर्दछ ।
पहिला माघेसंक्रान्तिको अवसरमा तीन, चार दिन मेला लग्ने गरे पनि पछिल्ला समयमा एक दिनमात्र मेला हुँदै आएको छ ।
यस वर्ष पोखरा महानगरपालिकाले मेलामा कन्दमूलको प्रदर्शनी गरेको थियो । बागवानी अनुसन्धान केन्द्र मालेपाटनसँगको साँझेदारीमा मन्दमूल प्रदर्शनी गरिएको पोखरा महानगरपालिका आर्थिक विकास महाशाखा प्रमुख मनहर कडरियाले जानकारी दिए ।
कास्कीसहित छिमेकी जिल्लाबाट किसान आउने भएकोले उनीहरुलाई कन्दमूका विषयमा जानकारी गराउन महानगरपालिकाले कन्दमूलको प्रदर्शनी गरेको जनाएको छ ।
सरकारले माघ १ गतेलाई जैविक विविधता दिवससमेत घोषणा गरेकोले लोप हुन लागेका स्थानीय र पुराना हराइसकेका तरकारी फलफूल अन्नलगायतलाई एकै ठाउँमा राखेर प्रदर्शनी गरिएको कडरियाले बताए ।
कडरियाले हराइसकेका वस्तुलाई नयाँ पुस्तासम्म हस्तान्तरण गर्न जरुरी भएको भन्दै महोत्सवमा कन्दमूल प्रदर्शनी गर्नुपरेको बताए । किसानका उत्पादनको प्रदर्शनी मात्र होइन उनीहरूबीच प्रतिष्पर्धा गराएर उत्कृष्टलाई पुरस्कृतसमेत गरिने उनले बताए ।
मेलामा सदाशिवजी सिद्देश्वर हरिहर मन्दिर समितिले भजन प्रतियोगिता आयोजना अध्यक्ष नगेन्द्र भण्डारीले जानकारी दिए ।
भण्डारीकै अध्यक्षतामा भएको कार्यक्रममा पोखरा-१७ की वडाध्यक्ष राधिका शाही योगीसहित जनप्रतिनिधि सहभागी थिए । भजन प्रतियोगिताको निर्णायक संयोजकमा संगीतकर्मी नवराज बराल थिए ।
मेलाकै अवसरमा कराँते प्रतियोगिता समेत सम्पन्न भएको बताइएको छ ।
