पोखरा । भारतमा भइरहेको पहिलो खो खो विश्वकपमा नेपालको पुरूष र महिला दुवै टोली फाइनल पुगेको छ ।
आज पुरूष र महिला दुवै टोलीको फाइनल खेल हुँदैछ र दुवैतर्फ नेपालले उपाधिका लागि भारतसँग प्रतिस्पर्धा गर्नेछ ।
महिलातर्फको फाइनल साँझ ७ बजे र पुरुषतर्फ राति ८ः१५ बजे सुरु हुनेछ । दुवै खेल नयाँ दिल्लीस्थित इन्दिरा गान्धी इन्डोर हलमा हुनेछ ।
महिलातर्फ नेपाल र भारत दुव अपराजित रहँदै फाइनल पुगेका हुन् । पुरूषतर्फ भारत अपराजित रहेर फाईनल पुग्दा नेपालले भने एक खेल मात्र हारेको छ ।
पहिलो खेलमा भारतसँग पराजित भएपछि नेपालले त्यसयता सबै खेल जितेर फाइनलसम्म आइपुगेको हो ।
फाइनलमा पुग्न सफल दुवै टोलीलाई प्रधानमन्त्री केपी शर्मा ओली, काठमाडौँ महानगरपालिकाका मेयर बालेन शाहलगायतले बधाई ज्ञापन गरेका छन् ।
