पोखरा । पोखरा महानगरपालिका वडा नं १२ स्थित ग्लोबल कलिजियटमा आयोजित रक्तदान कार्यक्रत्रममा ४१ युनिट रगत संकलन भएको छ ।
ग्लोवल युथ रेडक्रस सर्कलले आयोजना गरेको कार्यक्रमको उद्घाटन नेपाल रेडक्रस सोसाइटी कास्कीका सभापति दण्डराज शर्माले गरेका थिए ।
उनले रक्तदानप्रति आम नागरिकको धारणा निकै परिवर्तन भएको भन्दै हरेक उत्सवमा मानिसले रक्तदान गर्न थालेको बताए । जसका कारणले रगतमा निकै सहजता आएको उनको भनाइ छ ।
उनले भने, ‘विगतमा रगत किन्नु पर्थ्यो, केही अघिसम्म सोधभर्ना गर्नुपर्ने अवस्था थियो, अहिले पूरै निःशुल्क भयो ।’
नेपालमा २०२३ सालमा रक्तदान कार्यक्रम शुरु भएको भन्दै उनले कास्कीमा भने २०४६ सालमा पहिलो पटक रक्तदान भएको पाइएको जानकारी दिए ।
रेडक्रस कास्कीले एक वर्षमा ४० हजार बढी पोका रगत संकलन र वितरण गर्ने गरेको भन्दै उनले २०७८ फागुन १ गतेबाट गण्डकी प्रदेश सरकारको सहयोगमा पूरै निःशुल्क वितरण गर्ने गरिएको स्पष्ट पारे । अहिले जति रगत आवश्यक परे पनि निःशुल्क पाइने उनको भनाइ छ ।
पोखरामा पश्चिमाञ्चल क्षेत्रीय अस्पताल, मणिपाल शिक्षण अस्पताल, गण्डकी मेडिकल कलेज र रेडक्रस कास्कीको भवनबाट रगत संकलन, भण्डारण र वितरण हुने गरेको छ ।
पोखरामा संकलित रगत काठमाडौँ र चितवनसम्म पुर्याउने गरिएको छ । पोखरामा हरेक वर्ष करिब छ सय संघसंस्थाले रक्तदान कार्यक्रम आयोजना गर्ने गरेको सभापति शर्माले जानकारी दिए ।
कार्यक्रममा पोखरा-११ का वडाध्यक्ष प्रेम कर्माचार्य, रेडक्रस उपशाखा पोखरा-१२ का सभापति ईन्दिरा पन्त, ग्लोबल कलिजियटका प्राचार्य बाबुराम पन्तलगायतले रगतको विकल्प अन्य नभएको बताए । उनीहरुले हरेक योग्य व्यक्तिले वर्षमा कम्तीमा तीन पटक रक्तदान गर्न मिल्ने भन्दै यसलाई विशेष अभियानकै रुपमा अघि बढाउन आवश्यक भएको बताए ।
ग्लोवल युथ रेडक्रस सर्कलका अध्यक्ष ओपल धामीको अध्यक्षतामा भएको कार्यक्रममा शिक्षक नायक विन्दुप्रसाद सुवेदी थकितले स्वागत र सर्कल सचिव निकिता रानाभाटले सञ्चालन गरेकी थिइन् ।
