पोखरा । पोखरा महानगरपालिका वडा नं १३ आर्वास्थित रतन पाण्डे माविको सहायक प्रधानाध्यापकमा विष्णुप्रसाद दाहाल नियुक्त भएका छन् ।
२३ वर्षदेखि शिक्षण पेशामा आवद्ध दाहाल सोही विद्यालयमा १७ वर्षदेखि कार्यरत थिए । उनी अंग्रेजी विषयका शिक्षक हुन् । उनले अंग्रेजीमा स्नातकोत्तर गरेका छन् ।
अभिभावकसहितको विद्यालय व्यवस्थापन समितिको बैठकले दाहाललाई आइतबार सहायक प्रधानाध्यापकमा नियुक्त गरेको प्रधानाध्यापक डिल्लीराम बरालले जानकारी दिए ।
दाहाल नेपाल शिक्षक महासंघ कास्कीको सहसचिव र नेपाल राहत शिक्षक केन्द्रीय समितिको सहअध्यक्ष हुन् । उनी विभिन्न संघ-संस्थामा आवद्ध छन् ।
कास्कीको अन्नपूर्ण गाउँपालिका वडा नं २ ठूलाचौरमा जन्मिएका दाहाल हाल पोखरा-५ मा बसोबास गर्दै आएका छन् ।
विद्यालय व्यवस्थापन समिति अध्यक्ष विष्णुप्रसाद बरालले सहायक प्रधानाध्यापकमा दाहालको नियुक्त भएसँगै विद्यालयको गरिमा अझै बढ्ने विश्वास व्यक्त गरे ।
वि.सं. २०१४ सालमा स्थापित विद्यालयमा हाल करिब दुई सय विद्यार्थी अध्ययनरत छन् । विद्यालयमा केही वर्षदेखि कक्षा १२ सम्मको पढाई हुँदै आएको छ ।
कक्षा ११ र १२ मा शिक्षा र व्यवस्थापन संकायको पढाई हुँदै आइरहेको विद्यालयले जनाएको छ ।
