पोखरा । भोटेकोशी बाढीबाट प्रभावित बालबालिकाको दीर्घकालीन सहयोगका लागि गैरआवासीय नेपाली संघ (एनआरएनए) का पूर्वअध्यक्ष शेष घले र उनकी पत्नीले ५७ करोड ८५ लाख रुपैयाँसम्म सहयोग गर्ने घोषणा गरेका छन्। घलेको संस्था एमआइटी ग्रुप फाउन्डेसनले राष्ट्रिय बाल अधिकार परिषद्सँग समझदारी गर्दै उक्त रकम दीर्घकालीन रूपमा खर्च गर्ने निर्णय गरेको हो। यसबारे घलेले सामाजिक सञ्जालमार्फत जानकारी सार्वजनिक गरेका छन्।
सम्झौताअनुसार बाढीप्रभावित १८ वर्षमुनिका बालबालिकालाई कक्षा १२ सम्मको अध्ययनका लागि आवश्यक सहयोग उपलब्ध गराइनेछ। सहयोग रकम बालबालिकाको आवश्यकताअनुसार शिक्षा, खाना, आवास, कपडा तथा स्वास्थ्य उपचारजस्ता आधारभूत क्षेत्रमा खर्च गरिनेछ। बालबालिका हुर्कंदै जाँदा विपद्का कारण भोग्नुपरेको कठिनाइले उनीहरूको भविष्यका अवसर नछिनियोस् र आफूहरूलाई कसैले बिर्सेको छैन भन्ने अनुभूति होस् भन्ने उद्देश्यले यो पहल गरिएको संस्थाले जनाएको छ।
बाढीको पानीको सतह घटे पनि प्रभावित बालबालिकाका चुनौती भने तत्काल अन्त्य नहुने घलेले बताएका छन्। विपद्का कारण बालबालिकाको जीवनमा अकल्पनीय परिवर्तन आएको उल्लेख गर्दै घलेले भने, हामी भाग्यमानी महसुस गर्छौं कि कठिन समयमा मात्रै होइन, आगामी वर्षहरूमा पनि उनीहरूलाई सहयोग गर्न सक्छौं, ताकि उनीहरूले आफ्नो शिक्षा निरन्तरता दिन सकून्, आधारभूत आवश्यकता पूरा होस् र भविष्यलाई आशाका साथ हेर्न सकून्।
घलेले यो प्रयास आर्थिक सहयोगमा मात्र सीमित नभई प्रभावित बालबालिकाको दीर्घकालीन भविष्य सुरक्षित गर्ने प्रतिबद्धता भएको स्पष्ट पारेका छन्।
