प्रधानमन्त्री केपी शर्मा ओलीले कामको जिम्मेवारी लिनु नपर्ने पक्षले समाजमा असन्तुष्टिको माहौल खडा गरिरहेको बताउनुभएको छ ।
सरकारको सय दिने उपलब्धि सार्वजनिक गर्दै बुधवार उहाँले यस्तो बताउनुभएको हो । उहाँले अहिलेको सरकारप्रति नागरिकको अपेक्षा धेरै रहेकाले अपेक्षा पूरा गर्नुपर्ने दायित्व राज्यको भएको बताउनु भयो । उहाँले काम र अपेक्षा बीच सन्तुलन चाहिएको बताउनु भयो । प्रधानमन्त्री ओलीले नागरिकको अपेक्षा मात्रै बढाए पुग्ने तर कामको जिम्मेवारी लिनु नपर्ने पक्षले समाजमा असन्तुष्टिको माहौल खडा गरेको भन्दै सबै मिलेर सामना गर्नुपर्ने बेलामा राष्ट्रिय संकटबाट पनि राजनीतिक लाभ खोजिरहेको बताउनु भयो । उहाँले सरकारले पनि आफ्नो कामको रफ्तार बढाउनुपर्ने बताउनु भयो ।
उहाँले भन्नुभयो, ‘हामीलाई राम्ररी थाहा छ—यो सरकारप्रति तपाईहरूको अपेक्षा उच्च छ । तपाईको अपेक्षालाई पूरा गर्नु सरकारको दायित्व हो । तर यहाँनेर हाम्रो काम र अपेक्षा बीच सन्तुलन चाहिएको छ । हाम्रो संकल्प असीमित भए पनि हामीसँग भएको स्रोतसाधन सीमित छ । नागरिकको अपेक्षा मात्रै बढाए पुग्ने तर कामको जिम्मेवारी लिनु नपर्ने पक्षले समाजमा असन्तुष्टिको माहौल खडा गर्न खोजेको छ । मिलेर सामना गर्नुपर्ने राष्ट्रिय संकटबाट पनि राजनीतिक लाभ खोजिरहेको छ । तपाईहरुले यस कुरामा विचार पु¥याउनु पर्ने र हामीले आफ्नो कामको रफ्तार बढाउनु पर्नेछ । सय दिन सकियो, अर्को सय दिन र बाँकी अवधिमा गर्ने कामका योजनाहरु आजबाट शुरु हुन्छन् । बितेका एकसय दिनमा हामीले विपत्तिका बीच पनि गरेका केही नवीन थालनी स्थिरता, सुशासन र विकासको लक्ष्यतर्फका पाइला हुन् ।’
प्रधानमन्त्री ओलीले एकसय दिनमा सरकारले विपत्तिका बीच पनि नवीन थालनी स्थिरता, सुशासन र विकासको लक्ष्यतर्फ पाइला अघि बढाएको बताउनु भयो । अर्को सय दिन र बाँकी अवधिमा गर्ने कामका योजनाहरु आजबाट शुरु हुने बताउनु भयो ।
